Friday, July 2, 2010

همسات 3

 
أنا عمرى فوق قرن الزمان بقرون كتير

حبيت أعيش دنيا الحياه حر وأمير

طاف الزمان بيا القرون لكن أنا

غير بس مأسور بالجروح ما قدرت أصير

عجبى

صاحبت صاحبى وفى الطريق سابنى وغدر

العيب في صاحبى ولا ده حكم القدر؟

العيب فيا أنا .. لأنى من البدايه

معرفتش أختارلى .. صاحب صح فى السفر



يا قلبى يا مزروع وجع السنين جواك

إجمد يا قلبى كده وأصبر على اللى بلاك

بكره الحياه تحلى وجرحك يكون ذكراك

وإياك تسيب حبل الأمل طول ما الخالق معاك

ياااارب


عمر الهموم أكبر كتير من الفرح

والقلب قاسى من العذاب ياما إنجرح

يفضل هناك رب العباد خالق السما

يكرمنى يوم واحس قلبى بينشرح


يا موت يا قاتل كل شئ فينا

طايح وشايل راسنا عن رقابينا

لا هنبكى منك ولا هنخاف خلاص

العمر لحظه وخوفى لاتضيع بأيادينا

11 comments:

Anonymous said...

السلام عليكم ورحمة الله وبركاته
ماأروع كلماتك التى تمس القلوب
مأروع تعبيراتك رغم قسوتها وتمسكها بالالم
فى انتظار ما تجود وتمتعنا بها كلماتك وقلمك
ولكنى اشتقت لكتابتك فى الزجل الساخر
فى انتظار جديدك
wise

Anonymous said...

بكره الحياه تحلى وجرحك يكون ذكراك

وإياك تسيب حبل الأمل طول ما الخالق معاك

الأمل هو نبع الحياة وحياتي انا وياك

بكره الحياه تحلى وجرحك يكون دواك

مها البنا said...

Wise
اروع ما فى تعبيراتى اتها عجبتك
اكيد لو كتبت شئ ساخر هرفعه على المدونه
لكن المشكله ان الواحد من كتر السخريه المؤلمه اللى بنشوفها فى حياتنا مش بقى عارف هيسخر من ايه ولا ايه
ويا ترى هيضحك الناس ولا هيضحك على نفسه؟
انا كمان منتظره جديدك فى طريق للجنه
يارب اقرالك قريب

Do3aa EL-Shoprawy said...

اولا : سلاااااااااااام عليكم يا أغلي بنى ادمه عندى ف الدنيا

ثانيا : والله يا مها مش عارفه أقولك ايه
ماشاء الله ولا قوة الا بالله
الواحد يدوب فتح الباب لقي طوفاااااااااان
ربنا يزيدك يا حبيبتى وتمتعينا أكتر واكتر بكلماتك الرائعه

واللى كتير قوي بتدوس على اوجاااع كتير جوانا

مستنيه كل حرف منك

يا ....... طبعا انتى الوحيده اللى عارفه مكان النقط

أكمل مع التعليل

هههههههههههه

بجد بجد

بحبك ف الله

مها البنا said...

دعاااء

عليكم السلام ورحمة الله وبركاته

كله بعد فضل ربنا بتشجيعك يا قمر

اسفه ان كانت كلماتى بتدوس على حاجات جواكم .. لكن ساعات لازم نشوف الألم وندوس عليه عشان نطهره ونعالجه صح

انا النقط فبعينك

مش هكملها يا .......... أكملى انتى بقى ههههههه

أحبك الذى أحببتنى فيه يارب وجمعنى بك تحت العرش .. أمين

Anonymous said...

جميلة الكلمات

وبالنسبه للألم ففيه ناس بتشوف الألم وتدوس عليه علشان تطهره
وفيه ناس بتدوس عليه علشان تزيده عمق

ربنا يجعلنا من النوع الأول

وشكرا لكلماتك الرائعة

Unknown said...

عمر الهموم أكبر كتير من الفرح

والقلب قاسى من العذاب ياما إنجرح

يفضل هناك رب العباد خالق السما

يكرمنى يوم واحس قلبى بينشرح

مها البنا said...

Mr. Anonymous

سعيده ان الكلمات عجبت حضرتك

فعلا فيه ناس بتستلذ الألم وبتدوس عليه عشان يتعمق .. وهى بس اللى بتدفع التمن فى الأخر لأن فى الغالب الشخص اللى سبب الألم ده بيكون مش باله أصلا

لكن برضه زى ما قلت حضرتك .. ساعات لازم تدوس قوى على الجرح عشان نطلع كل اللى فيه ونطهره وبعدين نغطيه ونسيبه يخف مع نفسه

المهم اننا منتصورش ان الألم لما يخف مش هيسيب أثر .. لأن أكيد هيكون فيه علامه مكانه بتقولنا..

انه في يوم ما .. قام أحدهم بإحداث جرح قاطع ها هنا


شكرا لتعليق حضرتك الجميل

مها البنا said...

أستاذ العيسوى الصغير

دائما ما يبقى الأمل فى رب العباد .. هو من نرجو .. وهو من نثق برحمته

شكرا على مرورك الطيب

هبة الله الهادى said...

معبرة جدا يامها لدرجة انى فعلا مش قادرة اوصف قد ايه حلوة ومؤثرة استمرى ويارب بالتوفيق دايما ان شاء الله

مها البنا said...

هبه !!

تغيبى تغيبى وتظهرى مره واحده

وحشانى يا قمر

اكيد هستمر بإذن الله طول مانا حاسه بتشجيعكم ليا

ربنا يباركلك