Saturday, July 24, 2010

إمشى ودوس


إمشى ودوس
على أيام الدنيا الصعبه
على أوهام أشواق ومحبه
على أحزان وبعاد أو غربه
إوعى تفكر ولا تحوس
إبعد عنها وإمشى ودوس
لو يوم جالك صاحب تانى
لازم تبقى عنيد وأنانى
فكر يوم ما يبيعك هو
يلقى هواك كرابيج وتروس
وإوعى تفكر
إمشى ودوس
لو يوم صاحب الشركه بتاعك
جه وإتسبب كده فى صداعك
فكر إن فى واحد باعك
وإن بفعله عليك مدسوس
يبقى ساعتها تبص عليه
حُط صوابعك جُوه عنيه
وإفضل قاعد على رِجلِيه لما يلوص
وإمشى ودوس
يابنى الدنيا دى مهما تحاول
أكتر م المكتوب مش طايل
ليه تقضيها صراع ومشاكل
وتحسسنى إنك منحوس
وقالب عمرى معاك لكابوس !
يابنى بقولك واسمع منى
سيب الدنيا وإمشى وغنى
واللى يبيعك يوم فى حياتك
إسبق بيعه وشيله من بالك إنت كمان
وإكتب لافته كبيره على ضهره
بالمجان
من غير فلوس
وابعد عنه
وامشى ودووووس

26 comments:

Noha Saleh said...

ايه ده يامها
جميلة اوى بجد
ياريت الواحد يقدر يدوس على اى حاجة تزعله بسهولة كده
اكتر من ممتاز حاولى تعملى كتاب بجد هيكون جميل اوى لو فكرتى فى الموضوع ده

Anonymous said...

السلام عليكم ورحمة الله وبركاته
روووووووووووعة ودعوة جميله منك لتخطى المشاكل
وانا مع نهى انتى لازم بجد تعملى لك كتاب
ولو ان سعادتك اتاخرت اوووووووى المرة لحد ما منيتى علينا بحاجة جديدة
بس مش مشكله نخليها علينا المرة ده
وكالعادة ساقف فى الطابور لانتظار جديدك
سلااااااااااام
wise

Anonymous said...

وق يا عم ..

مأهوعشان عايشين ف دنيا

مش ف جنة ونعيم يعُم

لازم نشوف كل هم بجنبه فرحة

وكل فرحة يحاوطها هم

ليه احنا بأة نسيب فرحنا

ونعيش همومنا ونقلبها غم ؟!

روق يا عم

ابتسام .

مها البنا said...

نهى

بجد بجد بفرح قوى برأيك ومتابعتك

بس مش لدرجة كتاااب يعنى

وبعدين انتى عارفه دور النشر كتير بس هى النفس بقى ههههههههه

مها البنا said...

مين دى اللى هتقف فى الطابور؟؟

وايز هااانم؟؟

مش ممكن

دانا عاوزه اشوفلى واسطه فى الطابور بتاع القصه بتاعتك يمكن حد يطلعنى قدام شويه واقرالك حاجه جديده

قال طابور قال

والله دانا غلبااانه


نيجى بقى للهزار؟؟

تعرفى؟ احيانا بنقف نفكر عشان نزيل عقبه من طريقنا وبننسى ان كل اللى علينا هو اننا ندوس ونخطى عليها

ونكمل لقدام

وعلى جنب كده !!

شكرا على مساعدتى فى تعديل قافية بيت

دايما سباقه بالخير يا وايزى

مها البنا said...

إبتساااااام ؟؟

تصدقى مصدقتش نفسى؟

والله بجد فرحت لما لقيتك رديتى

وقلت مش انتى .. بس دخلت ع المكنه وقريت (روق يا عم) كامله

ساعتها قلت فعلا هى ابتساام

يارب تتابعى على طول

وبجد عجبتنى اخر حاجتين كتبتيهم قوى

باذن الله اروح ارد عليهم فى المكنه

نورتى

وابقى تعالى تااانى :) :) :)

Magdy Hatem said...

ما شاء الله جميلة جدا
ودعوة جميلة الي النظر الي الامام
وعلي فكرة فكرتي بنص في ثانوي لايليا ابو ماضي

كم تشتكي وتقول إنك معدم = والأرض ملكك والسما والأنجم


ولك الحقول وزهرها ونخيلها = ونسيمها والبلبل المترنم


والماء حولك فضة رقراقة = والشمس فوقك عسجد يتضرم


والنور يبني في السفوح وفي الذرا = دورا مزخرفة وحينا يهدم


هشت لك الدنيا فما لك واجما؟ = وتبسمت فعلام لا تتبسم؟


إن كنت مكتئبا لعز قد مضى = هيهات يرجعه اليك تندُم


أو كنت تشفق من حلول مصيبة = هيهات يمنع أن تحل تجهم


أو كنت جاوزت الشباب فلا تقل = شاخ الزمان فإنه لا يهرم


انظر فما زالت تطل من الثرى = صور تكاد لحسنها تتكلم

سلسبيل said...

كلمات راااائعة
تسلم أيدك حبيبتى

تحياتى لك

عمرو يسرى said...

الله كلمات جميله ومعانى اجمل ولكن السؤال
اعمل ايه لو ماعرفتش ادوس
على اللى فى الماضى داسنى
يمكن اعرف فى المستقبل انى ادوس
على اى حد يفكر عليا يدوس
بس عايز اعرف اعمل ايه فى اللى دسنى
ومشاعرى مش عارفه على جرحه تدوس
يظهر لى من الماضى اعمل ناسى وامشى وادوس
بس مشاعرى مش قادره تنسى الجرح وعلبه تدوس
قوللى اعمل ايه فى مشاعرى اللى مش عارفه علي جرحه تدوس
لاحسن يجئ عليا اليوم والوص
بالرغم انى بيعه و من غير فلوس
بس جرحه مأثر فيا ومش عارف على جرحه ادوس

مها البنا said...

أستاذ مجدى حاتم

اولا نورت المدونه

ثانيا و على فكره انا من أشد المعجبين بأشعار إيليا بو ماضى

وبحب جدا قصيدة الطلاسم


وفعلاً فى اغلب الأحيان بنبقى محتاجين نسيب الماضى بكل ما فيه ونركز فى الحاضر عشان نعمل المستقبل

ده فعلا دعوه للتفاؤل وللصمود لمن يستوعب ما بين الكلمات

أسعدتنى القصيده التى اضفتها حضرتك فعلاً

مها البنا said...

سلبيل !!

تسلم إيدك وقلبك يارب

نورتى المدونه يا قمر

مها البنا said...

أستاذ عمرو يسرى !!!

سعيده جدا ان الكلمات والمعانى عجبت حضرتك

وبالنسبه للسؤال ..

فالجواب هو متعملش حاجه

فكر فى بكره والأيام أكبر طبيب لجراح الزمن وغدر الصحاب

أسأل الله لنا ولك وللمسلمين خير الدارين

أمين

عمرو يسرى said...

عندك حق وشكرا للاجابه

Noha Saleh said...

مها طريقة قائمة المدونات انا حطيتهالك هنا كمان علشان لو ماشوفتيهاش عندى
بصى بقى ياقمر علشان تعملى القايمة دى بتفتحى تصميم اللى هى فوق فى الصفحة جنب تسجيل الخروج كده
بعد مابتدخلى على تصميم بتضغطى على اضافة اداه هتتفتحلك قايمة اختارى منها قائمة المدونات الالكترونية وبعد كده اى مدونة عاوزة تضيفيها بتاخدى اللينك بتاعها وبتحطيه زى ماهو وبتقوليله اضافة ثم حفظ وبس خلاص ولو فى حاجة اسألينى

Noha Saleh said...

مها
نسيت اقولك تكبير التعليقات
بتدخلى تصميم وبتفتحى مصمم النماذج وبتختارى من اليمين متقدم وبعدين نص الصفحة وتكبرى الخط وتقوليله تطبيق على المدونة

مها البنا said...

أستاذ عمرو يسرى

الشكر لله

مها البنا said...

نهى

يا سلااااام


شايفه الدنيا بقت حلوه إزاى لما الواحد بقى يشوف الردود كويس؟؟

بس كان فيه وصفه أسهل من اللى قلتيها

إنى أبطل بخل واغير النضاره هههههه

متشكره بجد يا نهى وربنا يجازيكى عنى وعن الغلابه اللى هيقروا الردود خير يارب

Noha Saleh said...

جميل اوى بس فين قايمة المدونات؟؟؟؟؟؟؟؟

مها البنا said...

إلقى نظره تانيه كده وهتشوفيهم إن شاء الله

جزاك الله الف خير يا نهى

Noha Saleh said...

تمام يامها
حلوة اوى اوى اوى

العيسوى الصغير said...

دعوة لبيع الخاين

hebatallah el hady said...

ايه ده يامها بجد راااااااااااااااائعة جداااااااااا
الله ينور

Anonymous said...

ايه ده ماشاء الله

دانا الاتوبيس اتأخر خااالص

معلش بقي ماحنا تبع الشعب

المهم يا مهااااا

طبعا انتى عارفه رايي

وموضوع الكتاب ده من زمااااان بقولهولك

انما بجد بجد

فرحت زيك لما شفت اسم ابتسااااام

هو النت منفد على بعضه ولا ايه

هههههههههههههه

عشان بس تعرفي ان الناس متابعينك مكان ما تروحي


حني علينا بقي


طبعاااا زمااانك عماله تقولى مين البونيه دى

اكيد انا طبعا

مافي غيري

do3aa

بس كسلت اسجل دخووول

دائما للامام ويارب نقدر ندوس على اى حاجه مزيفه ف حياتنا

بحبك جدا ... ووحشتيني جدا

مها البنا said...

أستاذ العيسوى الصغير

نعم

دعوه للنظر للأمام وعدم الالتفات لإلتقاط مالا\ومن لا يستحق

دعوه للغد

دمت فى حفظ الله

مها البنا said...

هبه !!

الحمد لله انها عجبتك

تابعونا تجدوا ما يسركم :)

مها البنا said...

دعاااء !!

المشكله مش ان الأتوبيس إتأخر .. لالالالا ... المشكله انه طلع ملهوش فرااامل :)

وعلى فكره يعنى

أنا مسألتش نفسى ولو للحظه مين دى؟ لأن ببساطه اللماضه دى ليها ناسها :)


إنتى كمان وحشتينى قوى

يارب يجمعنا مع بعض تحت العرش ونفضل متحابات فى الله على طول