Saturday, July 31, 2010

مصر


تحديث 

بما إن مصر وحشتنى قوى

وبما إن مصر محيرااانى قوى

وبما إنى قريت بوست  يعنى إيه كلمة وطن

فى مدونة كلام فاضى

وفكرنى بحاجات كتيييييير قوى

فقلت أحدث البوست ده ونقراه كلنا سوا

يارب يعجبكم وتوصلكم رسالتى

دمتم فى خير


سألونى يوم عن الحياه وعن القدر
وقالولى ممكن بالدعاء نمحى الخطر؟
سألونى برده عن الألام وعن الوجع
وعن المفاصل والمقاصل والسلع
سألوا كمان عن شمسنا وقت الرحيل
وعن مصر الحبيبه
ولو فعلا المصرى أصيل؟
وقالولى أنتم فراعنه ولا أبناء نيل؟
ولا أنتم ملكوش جنس ومن كل حدب نُسِّيل؟
**********
أنا قلت فرعون كان ملك حكم البلاد بالنار
بنى الهرم والمعبد وساب حضاره غايه فى الإبهار
وكان برضوا يوسف وموسى فى مصر ويا هارون
وكمان فى مصر زمان كان النبى إبراهيم
أقول أبوهم كلهم .. أبو العرب إسماعيل
كانت أمه مصريه .. هاجر زوجة الخليل
لو كل دول من مصر .. ومصر فيها النيل
وكلنا من نسل هاجر وإبراهيم
تفتكروا بالفطنه ياهل الأدب والقول
المصرى من كل ده ممكن يبقى إبن مين؟
**********
سألونى قالوا طيب لو كنت إبن النيل
والمصرى أصله الطيب خلاه إبن الخليل
فينكم من العروبه ومن النشيد الطويل؟
فينكم من القوميه؟
فينكم من الحريه ومن الديمقراطيه
والعلم والترتيل؟
لو كنت مصرى أصيل
فينك يابن النيل من ثورة التصحيح؟
والأرض والمماليك
وعبيد فى صحن البيت تاكل ثمار التوت
والقمح والفتافيت؟
وفين الأزهر المزهر وفين القاهره؟
فين المعز لدينه؟
وفين المبخره؟
فين مصر يابن النيل؟
واقفه هنا جنبك ولا ضاعت ورا؟
**********
أنا خدنى صمت طويل وسكت المره دى
ووقفت أسأل معاهم هى فين بلدى؟
أنا بلدى كانت هنا شاهده على الزمن
بالأزهر المحترم والهرم والجمل
والنيل والمشربيه
وصبيه صغيره بضفيره
بتلعب ويا أخوها ساعة مغربيه
وأذان فى جامع قريب معاه جرس الكنيسه
كان واقف الشيخ عُبَّيِّد مع المقدس عيسى
دورت بعنيا يمكن ألاقيهم
لقيت زمانى واقف بيبصلى فيهم
قلت إلحقنى يا زمن .. مصرى مانيش لاقيها
ولابقيت شايف نيلها ولياليها
بص الزمن نظره ساب حكمته فيها
وقال إسمع جملتى وفكر فى معانيها
مصر كانت هنا .. لما كانت مصر لولادها
هما اللى بنوها .. وهما اللى يحموها
لو عاوز مصر يابنى .. ممكن تلاقيها
لو يوم رجع نيلها يصب لولادها
ويوم رجعت ولادها من تانى تبنيها
**********

18 comments:

Anonymous said...

السلام عليكم ورحمة الله وبركاته
اخييييييييييرا نشرتى وسمحت لنا نستمتع بابداعاتك
ماشاء الله مش عايزةاقول من اروع ما قرات لك بس يمكن تفوقتى على نفسك جدا فى النوع ده من الاشعار فى انتظار المزيد وبارك الله فيما كتبتى وفى مدونتك التى اتوقع ان تمتعينا فيها بما تجود به اناملك المبدعة

Maha Elbana said...

عليكم السلااااااااام ورحمة الله وبركاته

أعمل إيه فى تحميسكم ليا؟؟ ربنا ما يحرمنى منكم جميعا يارب

ربنا يباركلك على كلامك بس انا أقل منه كتييييير

هحاول أكتر فى الزجل ولو أنى بعشق الفصحى

لكن رأيك دايما بيهمنى

وان شاء الله تقرى كتير وننشر القديم كمان


الله المستعان

Anonymous said...

حقيقه كلماتك روعه استاذه

بورك لك فى قلمك

Anonymous said...

جميله جدا يا مها
مع انها اول حاجه تكتبيها بالعاميه

ولكن اوضحت انك متمكنه من كل شئ

فصحى عاميه قصص شعر كله كله عيني عليكي بارده ولعه ههههه

ربنا يبارك فيكي ويحفظك ويزيدك ان شاء الله من كل خير

Wise said...

الله انتى حديثتيها
برافو عليكى
بجد من اروع من كتبتى
ربنا يحفظك من كل شر

مها البنا said...

Wise !!

الله ع الدعوه الجميله ع الصبح

ربنا يكرمك يارب

Haytham Alsayes said...

ماشاء الله
كلمات جميلة
وربنا يستر علي مصر فعلا

لنا الله

تحياتي المدونة الرائعة

sun of free dom said...

ام الدنيا

تسلم الايادى

عمرو يسرى said...

الله الله كلامات جميله جدا
تسلم الايادى

Noha Saleh said...

ايه ده انا اسمى مكتوووووب(:
الله يامها
ايه الجمال ده
بجد حلوة اوى اوى اوى
تسلميلنا وتكتبيلنا حاجات حلوة كده دايما

مها البنا said...

أستاذ هيثم السايس

سعدت جدا ان المدونه عجبت حضرتك

وبإذن الله تتابع معانا كل جديد


نورت المدونه

مها البنا said...

شمس الحريه Sun of free dom :)

تسلمى يا قمر

فعلا مصر أمالدنيا

بس الحاجه بعافيه حبتين اليومين دول :)

مها البنا said...

أستاذ عمرو يسرى

سلمك الله من كل سوء

سعيده انها عجبت حضرتك

مها البنا said...

نهى

تسلمى يا قمر

ربنا يباركلك وكل سنه وانتى وكل الأمه العربيه والاسلاميه بخير

:)

ديالا said...

اقولك حاجه وتصدقيني

انا انبهرت بجد من كلامك

حسيت بجد ان في حد من الشعرا القدام هما الي بيقولوا الكلام ده كلام حلو ومعناه احلي بصي كله كده علي بعضه تحفه

كل سنه وانتي طيبه

مها البنا said...

أقولك أنا حاجه وتصدقينى؟

أنا مش لاقيه رد خااالص على كلامك

بجد أسعدنى قوى .. لكن فى نفس الوقت .. عارفه إنى أقل كثيراً من ذلك

وعلى جنب كده

دى أول قصيده زجليه أكتبها فى حياتى

يعنى تقدرى تقولى عليها كده

حظ المبتدئين :)

هبة الله الهادى said...

بجد وبدون مبالغة مش عارفة اوصفلك قد ايه الكلمات حلوة جدا ومعبرة
no comment just WoooooooooooW

مها البنا said...

هبه

مش بقولك بفرح لما بلاقيكى على المدونه؟

الكلمات معبره عشان هى صوره من جوايا

الحمد لله انى قدرت اوصلها