Wednesday, July 7, 2010

ألف وش


ألف وش وألف لون وألف كلمه مزوقين
مره ترفعنى النجوم ومره أسفل سافلين
مره تدمع بالعيون ومره كالشيطان رجيم
بره البيت عايش حياتك ع الصراط المستقيم
جوه تعمل ألف مشكل ويختفى الوش الرحيم
تتقلب كائن خرافى ليه فصيلة دم جيم
يتقلب حالك وحالى ويصبح البيت كالجحيم
يالا مش فارقه الحكايه ولا يوم هندم ع السنين
همشى وأبعد عن حياتك ولا هيرجعنى الحنين
هبتدى تانى حياتى وأكسب الباقى من سنينى
وأعتبر عمرى اللى عدى ...
.
 .
.
صفحه من كراس قديم

24 comments:

Anonymous said...

كلمات جميلة

لكن قاسية وظالمة فى نفس الوقت

لأن مافيش انسان فصيلة دمه جيم ههه

وبعدين البيت عمر ما حد يقدر يحوله جنة لوحده ولا يقدر يحوله لجحيم لوحده

لازم الكل بيشترك

مها البنا said...

الكلمات ممكن تكون قاسيه لكنها مش ظالمه أبدا

وفعلا مفيش إنسان فصيلة دمه جيم .. عشان كده أنا قلت (كائن خرافى) والكائن الخرافى ممكن تكون فصيلته سين وصاد كمان مش بس جيم

أنا موافقه حضرتك إن البيت مش ممكن حد لوحده يقدر يحوله (لجنه) لكن يقدر حد لوحده يحوله (لجحيم) وبمنتهى البساطه

الخراب دايما أسهل كتير من البناء

شرفتونى بالتعليق والنقاش

Anonymous said...

نقاشي مع حضرتك جميل
وأسلوبه راقى وعال العال
لكن افضل انهيه
بدل ما يتحول لجدال
لاني هكتب ساعتها عن واقع
مش عن رؤى ولا عن خيال

شكرا لنقاشك الممتع

سلسبيل said...

شعر رااااائعة
جزاك الله خيراً
ارجوا ان تتقبل مرورى

تحياتى لك

مها البنا said...

مجهول !!

العفو

مها البنا said...

سلسبيل

مرورك من أروع ما رأيته فى الصباح يا صغيرتى

مررت بمدونتك فوجدت روحا افتقدها منذ امد

دى أول مره تعدى على مدونتى وان شاء الله مش هتكون اخر مره


تحياتك مقبوله يا فتاتى وتقبلى منى جزيل تقديرى

Noha Saleh said...

اسلوبك رائع والله يامها وبالرغم من قسوة كلامك الا انه فعلا حقيقى جدا

مها البنا said...

نهى ..

الأروع هو انه عجبك

وفعلا فى هذا الزمن أصبح الكثيرين يمتلكون من الأوجه الكثير ويستبدلونها من حين لأخر


ربنا ينور بصيرتك وبصيرتنا ويكفينا شرهم

أمين

Anonymous said...

مع انه فعلا فيه ناس كتير لها اكتر من وش
إلا انه فيه ناس بتنظلم فى النصف ويتم اتهامهم ظلما بإن لهم اكتر من وش
ومع ذلك هما بيستحملوا كل شئ وكل اتهام لأجل الناس اللى بيحبوهم
ولأنهم فعلا ميقدروش يستخدموا اكتر من وش
ولو كانوا لهم اكتر من وش مكانش ابدا هيكون ده حالهم
وكانوا عاشوا حياه كلها كدب وغش من غير مشاكل ولا وش

توقيع
مظلوم

العيسوى الصغير said...

الفكرة حلوة و معروضة بشكل جديد

قهوة بالفانيليا - شيماء علي said...

starting over :)
دي أكتر حاجة مهمة في العالم .. اننا نتعلم نخلي الماضي ماضي و نمضي قدماً..
بس دة محتاج شجاعة كبيرة جدا ..
مش عند حد الا اللي يستاهل الحياة :)
كلامك جميل يا مها

مها البنا said...

أستاذ مظلوم


مش عارفه اقول لحضرتك ايه

لكن عن نفسى لما بحس بالظلم

بدعى ان ربنا يهدى اللى ظلمنى أو يهده

عشان ميظلمش حد تانى

مها البنا said...

استاذ العيسوى الصغير

شكراً على رأيك ومرورك

جزاك الله كل خير

مها البنا said...

شيماء

صح قوى

الماضى يفضل ماضى

والمستقبل مفتوح لمن يرغب فى العبور اليه الى ان يشاء الله

رأيك أسعدنى فعلاً

أم الخــلـود said...

اصحى يا نايم ووحد الدايم

(حملة الجسد الواحد)

أرجوا من المدونين الموقرين أن يضعوا شعار الحملة واسمها فقط فوقها (حملة الجسد الواحد) في الشريط الجانبي لمدوناتهم كدلالة على وحدة صف أمة محمد، ومن أجل قيام الولايات المتحدة الإسلامية.

لمزيد من المعلومات

http://dndanh111.blogspot.com/2010/06/blog-post_14.html

جعله الله في ميزان حسناتكم .. آمين

علاء المصرى كل يوم said...

كلمات هادفة وأسلوب رائع
دعوة فى ملتقى الكلمات
كاتب مصرى

مها البنا said...

أم الخلود .. نورتى المدونه بمرورك

مها البنا said...

أستاذ علاء المصرى

دى اول مره تزور المدونه

رأى حضرتك اعتز بيه

وان شاء الله مش أخر مره تزور المدونه

علاء المصرى كل يوم said...

حقا لقد عدت

ولكن هناك حملة للتضامن فى مدونتى

لا للأهمال

تحياتى

مها البنا said...

ان شاء الله اروح القى نظره

عودا احمدا

Alaa Salim - علاء سالم said...

كلمات جميله فعلاً وبتعبر عن واقع موجود بالفعل في حياة ناس كتير

خالص تحياتي لقلمك المبدع

مها البنا said...

أستاذ علاء

الحمد لله ان الكلمات عجبت حضرتك

فعلا للأسف الواقع ده أصبح ملموس بشكل مرعب

عافانا الله وإياكم من النفاق

هبة الله الهادى said...

كلماتها حلوة اوى يامها ومعبرة جدا بجد

مها البنا said...

والله الأحلى لما بقرالك رد يا هبه

وحشتينى بجد