في عز العتمة

في عز البرد والعتمه
لسه القلب بيعافر
وبيخاف من زمان عدى
ومن بكرة
وبيخاف من كلام اتقال
وبينزف من الشدة
ولسه كتير جوه القلب من كلمة
ومن همسة
ومن صرخة
ومن لمسة
ولسه حاجات كتير لسه
لكنه في صمته متلحف
ومتكتف
وطعم الصرخه جوه ضلوعه طعم الدم
وبينزف
لكن عندي ليكم بشرى
أنا لسه
اكيد لسه بقلب جرئ
ولسه القلب نبضه برئ
ولسه في روحه كل الخير
ولسه صديق
ولسه الحب في عيونه
ولسه الخير زارع ورد
وسط الضيق
وفي الضلمة
هغسل قلبي واتوضا
واصلي الفجر في المحراب
وبعد الفجر هستنى
مهو لازم أشوف الصبح
بعد العيشة في العتمة

إضحك :)

إضحك ضحكة بملو الفم وإتبسِّم

ده نور الصبح قدامك .. بيتنسِّم

وضحك الورد من صوتك .. بيترنِّم

وبيدندن

مع الضحكة

وبكرة جاي أهو بفرحة

بيتفنن ..

ويرسم ضحكة بالألوان

بريشة جميلة ع الجدران

بتتكلم ..

وبتعلم ..

جمال الضحك وفنونه

وبتسلم

إضحك

أصل الضحكة دي شئ رباني

ممكن تقلب شكل الدنيا

ونبقى في ثانية في عالم تاني

إضحك

أصل الضحكة دي سر جمالها

مهياش مِلك

ولا مرتبطة بإسم معين

ولا ليها سِلك

ولا ممكن يمحيها سجِّان

ولا يمسح فرحها إنسان

إضحك

كل الدنيا ما بيك بتضيق

إضحك ضحكة تبل الريق

تلقى الضحكة بلون الشمس

تمسح كل هموم الأمس

وتسبح بيك

لما قلوعك يوم تتقطع

وتبقى غريق