Saturday, February 27, 2010

قالولى إكتب



قالولى إكتب بالقلم كل اللى تحس بيه



أنا قلت هكتب نوع زجل .. الكل يحكى عليه



إصبروا وإستنوا عليا ..



هتشوفوا أنا هعمل إيه



**********



سنيت سن القلم وغمسته فى الدوايه



وع الورقه مشيته وقلت إحكى الحكايه



لكن وحياتى عندك إبعد عن الزعل



خلينا فى الحكاوى والعشق والغزل



إكتب عن الأحلام والورد والجنينه



والأطفال الصغار ماشيه بتمسك إيدينا



إكتب عن البسمه وإياك تقول ماتت



وإحكى عن النسمه فى الأيام اللى فاتت



**********



بص القلم ليا وقالى إخص عليك



عاوزنى أكتب حاجات مهيش موجوده فيك؟



عاوزنى أغش نفسى وأكذب عشان أرضيك؟



أنا لو هكتب هقول ع اللى إنت حاسس بيه



مش هكتب شعر جميل علشان يتحاكوا عليه



**********



بصيتله بالراحه وقلت زعلان ليه؟



من إمتى كان قلبى ممكن حد يداويه؟



لا تكتب ولا تقول .. ولا تحكى فى الحكايه



ده الأحزان والألام دايماً مالهاش نهايه



وعشان أنا جبان .. ومش هقدر ع البدايه



هكدب وأقول للناس



جيت أكتب بالقلم ..



ملقتش حبر فى الدوايه



5 comments:

Anonymous said...

wonderful, stick on

مها البنا said...

Thanx, i will

Ahmed HeRo said...

مين قال انك مش هتقول
على كل اللى فى قلبك بيدور
دور على حزنك وعيه ثور
وافتح للفرحة باب نور
انا زيك مقدرتش اقول
واحكى واغنى كلام معسول
وقت ما كان قلبى مقفول
لكن بصراحة وبقبول
قلمى وحبرى ليهم مفعول
بيهم حسيت بقى لى دور
وشعورى بقى احلى شعور
اكتب فضفض غنى وثور
على اللى فى قلبك ياما بيدور

تحياتى اليكى يا اميرة القلم فلم اجد عندك سوى الانغام الرائعة اللتى تجعلنى استمتع بكل حروف الهجاء اللتى تجعليها بموهبتك تكون احلى الكلمات .....أحمد سعيد

مها البنا said...

الحقيقة لا كلمات شكر تفي تشجيع حضرتك ..

وسعيدة جدا ان الكلمات أعجبتكم لدرجة التفاعل والرد بزجل جميل

أسعدني المرور والمتابعة وبإذن الله يكون فيه جديد دائما

أحمد سعيد said...

بأذن اللى فى ابداع دائم