حضارة إيه يا سيدنا البيه؟
سؤال واحد سألهولى لما كتبت عن بلدى
وقلت أنا فى يوم هحكى عن الحضاره دى لولدى
عشان كده أنا هقوله فى كلماتى اللى جايه قوام
أنا أقصد إيه بحضارتنا
اللى بناها جدودنا زمان.
*****
حضاره من عمر الزمن يا أستاذنا الجليل
حضاره فضلت عايشه وسطينا جيل ورا جيل
حضارة شعب كان يوم حر
داق المر ..
ولسه بيعافر
حضارة جدى بانى الهرم ، ولما بناه ..
دفنوه فى المحاجر
حضاره واقفه رغم الزحام بتتحدى الزمن
بتقول أنا هنا .. وهقولها فى العلن
حضارتنا مش مختزله فى كلام على الجدران
ولا حتى كانت فكره أو شخبطه ع الحيطان
ولا كانت حكر وواقفه على جدودنا زمان
المصرى مصرى وحر .. مهما كتر الكلام
مش ذنب أجدادنا إن قفلنا البيبان
وقعدنا نلطم ونندب الظلم والعدوان
وكبيرنا قاعد يشجب وهو أبو الطغيان
المصرى لسه هنا .. وقادر فى كل زمان
ينجح ويِعْلَى ويبنى كتير من الأهرام
عندك زويل والباز ومشرفه والسادات
عندك نجيب محفوظ ويعقوب القلوب
منكرش انهم كلهم نجحوا فى بلاد بره
لكنهم نجحوا وبنولنا ميت مسله
فى الطب والأداب والعلم بالأقلام
عرفت حضارة إيه؟؟
ولا أقولك كمان؟؟
عارفه إن بلدنا الحاليه واجعانا كلنا
بتدى خيرها لغيرنا وإحنا فى غربه هنا
يمكن دوه اللى واجعك ومخليك زعلان
إن بلدنا خيرها مش لينا زى زمان
لكن فى يوم هنرجع من تانى نبنيها
وهترجع الحضاره تانى لأراضيها
صدق فى كلماتى وإعتقد فيها
وهييجى يوم وتقول ..
البنت دى قالت
والحق كان ليها.
No comments:
Post a Comment