Thursday, February 2, 2012

لسه باقى


لسه باقى النور فى عينى
وإبتسامتى ونور جبينى
لسه باقى فيا دمى
ولسه باقى فيا صوت
مش هسيبك
غصب عنى
أصلى بحبك حد الموت
لسه باقى كتير عشانك
جوه صمتك وف كلامك
لسه عاشقك
أصلى حَبِّك .. زى مانتى
مهما حاولوا يمصوا دمى
لسه باقى لسان فى فمى
يحلف إنك كل همى
وبرده هتعيشى يا أمى
غصب عن عين اللى جابهم
أو كلابهم
لسه باقى فيا قلب
ينبض الخير ع البراح
تستحيل الصحرا ورد
والنخيل يملا الفلاة
لسه باقى كتير يا أمى
متخافيش
حتى لو قتلونى يوم
متبكنيش
لسه باقى كتير ولادك
جوه عينهم
ونور قلوبهم
هتلاقينى هناك بعيش

8 comments:

ظلالي البيضاء said...

أستاذة مها ..
كلماتك كلها نبض ودم وروح وحب لأم الدنيا .. من دمشق أقول .. كلنا أبناء أمنا .. عند الشدائد كلنا أبناء مصر .. مهما اختلفت بلداننا ..
مع التحية والتقدير .

مها البنا said...

ظلالى البيضاء
مصر جوه دمى .. مصر بجد .. أمى
سعيده قوى بتعليقك وأسأل الله أن يرفع الظلم عن العالم أجمع

تقبل احترامى

هبة فاروق said...

حلوه اوى يا مها ومن القلب ووصلت للقلب
معلش حبيبتى على التاخير الكمبيوتر دمر ومن بعده غلق المدونه بس رجعت والحمد لله
تحياتى لارق مها

مها البنا said...

هبه

تسلمى يا قمر وحمدلله على سلامتك وسلامة الكمبيوتر :)

نيللى على said...

كم جميل حبك لوطنك!
ربنا يحفظ بلدنا يارب ونشوفها أحلي بلد فى العالم يارب
تحياتي مها

ع فكرة وحشتني قصصك بقالك كتير مكتبتيش قصص قصيرة
منتظرين جديدك:)

مها البنا said...

نيللى على

يارب يتقبل دعائك ويحفظ البلد

بالنسبه للكتابه .. فانا بحاول .. دعواااتك يا قمر

أحمد سعيد said...

جميلة جداا تسلم الا يادى

مها البنا said...

Ahmed HeRo

الف شكر :)