Monday, February 27, 2012

تعرف !!


!!تعرف
أنا مش عارفه ليه حبيتك
ليه قربتك منى بسرعه
وليه حسيتك
!يمكن علشان كنت قريب 
!أو علشان كان قلبك طيب
أو علشان الدنيا فى قربك
!كان ليها نور
حاجه كده مش كان ليها وصف
كأن الدنيا مرصوصه رص
وحواليها سور
ويمكن علشان كنت غريبه
كنت بعيده
!!تعرف 
كان فيك حاجه عجيبه
وكل كلامك كان يتحس
كنت بحبك حب كبير
كنت فى عينى إنت الضى
وكنت فى قلبى النبض الحى
وكنت أمير
كنت بحبك كده وخلاص
من غير حتى ما أفكر لحظه
أو يوم أخاف
بس غريبه إنك مفهمتش
حقيقى مفاجأه
إنك فجأه فى يوم تتغير
من غير عذر
وكل كلامنا خناق فى خناق
راح إحساسنا
ومات جوانا حاجه جميله
ملهاش وصف
ويجوز لينا كل رثاء
!!تعرف
قلبى ساعتها كان بيموت
وننى عنيا فقد الضى
وراح الصوت
وإتمردت
وكرهتك
وكرهت الحب
وياما تعبت
وكان جوايا سؤال مكسور
وبقيت عاوزه أسيب الدنيا
وأخرج أنط لبره السور
وأعدى بحور
وبقيت بسخر من الأحباب
ومن الأحلام
ومن قصه وحدوته فى كتاب
وبقيت عارفه وشبه أكيده 
إن دى أوهام
وإتغيرت
ولسه مازال جوايا النبض
بس النبض لضخ الدم
من غير حب
من غير بغض
من غير حتى ما أشيل الهم
وإتأكدت
إنى طردتك كده من قلبى
زى بسرعه فى يوم ما دخلت

!!يا ترى فهمت

18 comments:

سواح في ملك اللــــــــــــــــــه- said...

كلمات جميلة

اهي عتاب ولوم

ام حب حقيقي

تحيتي

مها البنا said...

سواح فى ملك الله

لا هذا ولا ذاك

فالعتاب واللوم يكون لمن يستحق

والحب الحقيقى لا يخرج من القلب بسهوله

إنما هى مجرد خاطره تعبر عما قد تشعر به الفتاه إذا فقدت الثقه فيمن كانت تعتقد أنه أهلٌ لها

تحيتى

هبة فاروق said...

كلمات جميله شدتنى لاخر جمله
نابعه من القلب وصادقه
برافو يا مها اعجبتنى جداا

norahaty said...

خاطرة جميلة
وكلمات رقيقة
أحييكِ علـيها

مها البنا said...

هبه المميزه

أسعدتنى كلماتك جداُ .. وفرحت إنها عجبتك شدتك لأخر كلمه

رفعتى روحى المعنويه يا جميل :)

تحياتى

مها البنا said...

norahaty

أنا اللى بشكرك على مرورك الطيب

نورتى :)

منجي باكير said...

بوح وارف الجمال بليغ المقاصد و المعاني

تحياتي


سعيا منها لتطوير النقاش و الاستفادة من المدونين العرب ، مدونة الزمن الجميل تدعوك للزيارة و التفاعل !!!


-

Ahmed HeRo said...

رائعة فوق الوصف تسلم ايدك بجد
تحياتى A.HeRo

Noha Saleh said...

جميلة يامها
وحشتينى جدا على فكرة

مها البنا said...

منجى باكير

نورت المدونه .. جزاك الله خير على التشجيع

مها البنا said...

Ahmad HeRo

ربنا يخليك .. الحمد لله انها عجبت حضرتك


تحياتى

مها البنا said...

نهى صالح

إنتٍ كمان واحشانى كتير جدا على فكره

يارب متطوليش الغياب تانى بقى :)

ظلالي البيضاء said...

كلماتك تصف حالة حب يتبعها حالة كره .. لكن بينهما زمن من الألم والخيبة وفقدان الثقة ..

جميلة هذه الخاطرة ..
مع التحية

Anonymous said...

العتاب واللوم يكون لمن يستحق
كلمات جميلة
TE

مها البنا said...

ظلالى البيضاء

الأدق أن تلك الكلمات تصف حالة "حب" متبوعة بحالة "وجع" منتهية إلى حالة من "الا مبالاة" ... أعجبنى جدا تشبيه حضرتك

تحياتى

مها البنا said...

TE
أوافقك الرأى أن العتاب واللوم لا يكون إلا لمن يستحق .. ولكن الكلمات والكتابة لا تخضع أبدا لرأى صاحبها قدر ما تخضع لما يتأثر به من أحداث محيطه به وبمن هم قريبين منه

ولا تنس .. أجمل الشعر .. أكذبه

تحياتى :)

منجي باكير said...

نصّ مترف الجمال يجول في حدائق الحسّ الراقي


صاحب الزمن الجميل

مها البنا said...

منجى باكير

انما هو بعض من خيال شاعر وخواطره خطت على الورق يا صاحب الزمن الجميل