Sunday, January 23, 2011

همسات .. تحديث

بما إن قلمى معاند فيا بقاله فتره .. قلت أقلب فى أوراقى القديمه .. وأخرج إليكم ببعض الكتابات التى لم يسعفها الحظ والظروف لتحظى بمتابعتكم .. تحياتى .. ودعواتكم ربنا يكرم قلمى ويكتب بقى .. عشان انا تعبت من عناده فيا ):


إكتب يا صاحبى وقول ده الكتابه فن


ولا كل من قال فى يوم هكتب كان فنان

إكتب وقول ما فى قلبك لأحسن فى يوم نتجن

 
من إمتى كان لينا على القلم سلطان؟؟؟




يا هموم يا منقوع النكد فى بحر الحياه

 
مظلوم أنا فى الدنيا ظلم الحواه

تتعب وتلف وتدور فى الطريق

وعمرها ما قابلت غيرك فى منتهاه





الحزن مين يقدر يرده ولو جدع

والقلب مين يقدر يصده عن الخِدع

قول يا قلم أكتر عن الألام

إيه حرك الإنسان أو هده غير الوجع!!


 

الله يا خالق الأكوان رب السما

عايش حياتى على الأرض ومنها أنا

نفسى يارب لما يؤون الأوان


ويحين مماتى أكون بنفس مطمنه




الدنيا صعبه ومن جروحى شكيت

ولما جيت أحكى اللى عندى لقيت

الهم مالى الناس .. قتل الهنا

والحزن غطى جميع نواحى البيت


يا قلبى ليه مال الدموع خنقاك

أصرخ ونوح .. خرج جروح جواك

القلب قال نوحى يهد جبال

خلينى ساكت .. لاحسن فى نوحى هلاك
 

19 comments:

هبة فاروق said...

فى البداية يسلم قلمك على هذة الخاطرة
واتمنى ان يرجع قلمك وفكرك
قريب
تحياتى يا قمر

إبن النيل said...

السلام عليكم
أولا شكرا لزيارتك لمدونتي المتواضعة جدا وربنا يستجيب منك يارب
ثانيا كلماتك معبرة جدا و أكبد بتخرج فعلا من القلب لانها تجد طريقها المباشر للقلب
وربنا يكرم قلمك ويهدهولك علشان تمتعينا بلوحاتك الفنية بس شوفي ايه السبب يمكن حد مزعلة او حد جرحه والجرح نزف كل مداد القلم يارب أكون غلطان وتتطلع وعكه قلمية بسيطة
دمتي بكل خير

wise said...

مادام قلمك معاند
عندى اقتراح جميل
ايه رايك تعاندى انتى كمان معاه وتمسكيه غصب عنه وتكتبى به
وما فيش حداحسن من حد
فى انتظار جديدك
ما تتاخريشِ

Mohamed Elsayed said...

لو دق قلبك فى بحر الشوق

اكيد قلمك هيجمع كل القلوب

بجد خاطرة رقيقة تحكى الالام البشر

و فى انتظارك بخاطرة تفرح قلوب البشر

أنثى إستثنائيه said...

رائع ما سطره قلمك المتمرد..
فى وادى الدهشه نجلس فى حضرة
الابداع لا يسعنا سوى تهنئة صاحبة القلم..
دمتى مبدعه
كل الود

model said...

اتفق مع تعليق وايز الحكيم
عند بعند و اكتبي
و لو انه صعب
اعتقد الكلام جواكي بيستوي
على نار هادية و بتؤدة
و شوية هيثور و يغلي
و يطلع للنشر
عن رقيب
فعلا صورة حلوة للالم
و يا سلام لو تفرحي و تعيشينا معاكي الفرح

موديل
واحدة عاشت الالم
فكتبت
عايزة اخس
و عاست الفرح فكتبت عايزة اخس

او http://back2evans.blogspot.com/
موديل

وجع البنفسج said...

الوجع قائم بيننا وبين أقلامنا ، لا نتخلص من هذا إلا ليؤلمنا الاخر ،،، ربنا يبعد عنك الالم والهم والوجع .. خلي عندك امل انه اللي جاي اكيد أحلى ،،وربنا معانا ومعاكم ..

د.ريان said...

صباحكم خير وطيبة

مدونة جميلة ورائعة

د.ريان said...

صباحكم خير وطيبة

مدونة جميلة ورائعة

مها البنا said...

هبه
تسلمى يا قمر .. شهاده اعتز بيها :)

مها البنا said...

إبن النيل

جزاك الله خيراً على الدعاء

أسأل الله أن يرزقك خير منه

وإن شاء الله أنزل بالبوست الجديد النهارده بالليل

مها البنا said...

وايزى

أدينى سمعت كلامك وكتبت غصبن عنه

لما نشوف عنادنا ده هيوصلنا لفين (:

مها البنا said...

أستاذ محمد السيد

الخاطره جاهزه .. لكن معتقدش إنها هتفرح حد

دمت على خير

مها البنا said...

أنثى استثنائيه

إيه الكلام الجامد ده؟؟ ده تفوق على الخاطره اللى كاتباها وأظهرها مهلهله

أسعدنى جدا مرورك وتواجدك

مها البنا said...

موديل .. يا أروع دم خفيف

أدينى سمعت كلامك إنتى ووايز .. بس قلمى لسه مش فرحان عشان يفرحكوا

إدعى اللى فى بالى يتحقق وأنا أكتب أروع خاطره للفرح بإذن الله

دمتى فى حفظ الله يا قمر

مها البنا said...

وجع البنفسج

أنا أكتر واحده على الأرض مؤمنه بإن اللى (جاى) أكييييييييييد أحلى إن شاء الله

أصل أسوأ من (الحالى) مش ممكن يبقى فيه شئ (:

مها البنا said...

د ريان

الحمد الله ان المدونه عجبتك

دمت على خير

العصفورية said...

السيدة الفاضلة
تحياتي
لماذا القلم الحزين؟ والشعر في ذاته بهجة حتي لو كان عن الألم والمعاناة. هلا يتعلم قلمك من فيلسوف الضحك الحزين صلاح جاهين رحمة الله عليه " ياحزين ياقمقم تحت بحر الضياع
حزين أنا زيك وإيه مستطاع
الحزن مابقالوش جلال ياجدع
الحزن زي البرد ... زي الصداع" كما ترين الحزن يصبح أعراض شائعة، لكن الشعر فرح وبهجة حتي لو كان حزين.
"يا عندليب ماتخافش من غنوتك

قول شكوتك و احكي عن بلوتك

الغنوة مش هتموتك إنما

كتم الغنا هو اللي هيموتك" لقد سعدت بزيارة مدونتك. مع تقديري

مها البنا said...

العصفوريه

أولا أنا أيعد بمرور حضرتك على المدونه

وان شاء الله مش تبقى اخر مره

بس انا ليا تعقيب وحيد على رد حضرتك

لست حزينه .. ولكن لا أكتب إلا عندما أشعر بالحزن .. لكن حضرتك محق

فقلمى له الحق فى الاستمتاع قليلا بطعم كلمات الفرحه

سأحاول الكتابه فى تلك اللحظات ان شاء الله