Sunday, January 2, 2011

أغبيا


أغبيا
لما نفكر إنه ممكن تتهد أرض الأنبيا
ولما نيجى نصرخ فى الزحام والأنديه
واللى ع الهلال يقول
واللى ع الصليب يتكلم
ولما لا نقرا فى التاريخ ولا منه نتعلم!!
نبقى أغبيا
لما ننسى زمان سلاحنا فى الحروب
ولما ننسى إن فيه حرب بارده ف الدروب
وأن فيه أعداء وواقفه تصطادلنا فى العيوب
ونقف نتكلم عن معنى الرمز وأساسه
وننسى إن كل رمز ليه أتباعه وليه ناسه
لما ننسى فين أساس المشكله
ونقعد نفبرك فى الفوازير والأحجيه !!
نبقى أغبيا
لما ألاقى الدم نازف من أخويا المصرى
لما قلبى يتوجع ويتوه معاه عقلى
لما ألاقى أعداء هناك بتشوه فى بلدى
فاكرين إن عرش الوحده ممكن يتهزله وطنى !!
يبقوا أغبيا
المصرى مصرى مهما طال بيه الزمن
وقت الحروب بايع الدم رخيص من غير تمن
لا همه نفسه ولا ولاده
وكل همه عرض أرضه المؤتمن
المصرى مصرى عايش فى الحياه شامخ
ساعات بيقى شيطان وساعات يكون قديس
طيب ودمه خفيف ويموت على النكته
لكن فى وقت الضيق أسود بإيد واحده
المصرى فى التاريخ صاحب جدع وأصيل
سماره لون البلد مروى بمى النيل
فى الصبح يزرع ويفلح
فى الضهر يتعلم
ترنيمه أو ترتيل
ماسك كتابه بإيده قرآن أو إنجيل
وفى المسا حكايات تدور فى حضن الليل
بينهم صحيح فروقات
منهم كريم وبخيل
منهم صحيح وعليل
فيهم شباب الجيل
الكل مصرى هنا مفيهاش كلام تانى
الأصل أرض الجدود والحسن ربانى
فى السُخره إتظلموا سوا
وفى الرغد عِيش تانى
لو ننسى يوم كل ده وتفرقنا الرموز !!
نبقى جاموس أبيض مش عارف فين يدوس
علشان كده هقول وبصوتى من تانى
لو تنسوا فى يوم كلامى !!
وتحاولوا مع كل ده 

تهزوا عرش بلادى
وتهدوا أمجادى
وتبوروا أرضى
وتتناسوا إنى مصرى !!
.
.
.
تبقوا أغبيا

31 comments:

Nour Elhouda said...

homa a3;beyah ..... w a5af el 7okoma bardo yeb2o a3'beyah :S

مها البنا said...

ربنا يستر يا نور
بس أنا ثقتى فى ولاد بلدى كبير

وقبل كل ده .. ثقتى فى ربنا أكبر

هبة فاروق said...

الله يحفظ بلدنا من اى فتنة واى شر ويعدى الازمة دى وتمر بسلام وحقول زى زمان ايام ثورة 19 يحيا الهلال مع الصليب
مشكور يا مها وتحياتى لقلمك المبدع دائما

مها البنا said...

اللهم أمين يا هبه
التاريخ بيقول إن كل المحاولات فشلت فى هز المصريين وخلخلتهم حتى وإن نجحت لفتره وجيزه
أنا واثقه ان كل مصرى جواه نفس الوجع وعنده نفس الفهم للى بيحصل
مش هنولهم اللى فى بالهم
وبس

تحياتى ليكى يا هبه

Magdy Hatem said...

هايل بجد احساسك اللي باين علي الورق
وان شاء الله مصر دايما بخير وتعدي المحن
احنا وطن واحد وشعب واحد
بنخاف علي بعض بنحارب مع بعض
في الشغل مسلم ومسيحي اصحاب والمدرسة والشارع والجامعة اصحاب
وان شاء نجتمع يد واحدة علي محاربة الارهاب والعدوان

شيرين سامي said...

كلام رائع من أجمل ما قرأت عن الوحده الوطنيه
تسلم ايديك تحياتي الخالصه

(ست* جنى* الحسن) said...

سلامو عليكو..

كلمات جميلة ومعبرة بجد

تسلم ايدك
لك تحياتى

Casper said...

بلا شك الكلمات جميلة

_______

لكن انا حابب اقول حاجة

بجد اللى بيعمل كده وعمان بيخرب في بلدنا
ده في قمة التفاهة والغباء لانه باع نفسه لسوري في اللفظ " كلاب " وإن كانت الكلاب أفضل منهم بكثير

اللى عاوز يخرب في مصر ويهدها ده لا ليه ملة ولا دين
ديانته هي الارهاب وملته هي الارهاب

ومهما حصل مصر فيكي يا مصر
هتفضلي بلد الامن والامان

مش شعارات ولا مثاليات
لكن كلمة طالعة من قلب مصري وبيخاف على مصر

مش عارف اقول ايه تاني
غير حسبنا الله ونعم الوكيل في اللى عاوز يدمر البلد دي

وخالص عزائى للاخوة الاقباط
ويارب يرحم امواتنا جميعا

,,,

مها البنا said...

أستاذ مجدى حاتم

فعلا إحنا أصحاب وزملاء ورفاق درب ورفاق صبا

إحنا ... مصريين .... بكل ما تحمله الكلمه من معنى

دمت فى حفظ الله

مها البنا said...

شيرين سامى

إنما هو إحساس بداخلى فأخرجته على الورق

الحمد لله إنه عجبك والشكر له أن هدانى لتلك الكلمات

مها البنا said...

ست جنى الحسن

إنتى فيييييييييينك؟

أسعدنى جدا عودتك وتعليقك :D

دمتى بخير وعلى خير

مها البنا said...

Casper

كلماتك تنبض بالحقد على الفاعلين وبالأسى على المصريين

وأشاركك كلا الشعورين

أتعلم؟؟

عندما كنت بالجامعه .. وقعت بعض الإضطرابات الدوليه من قِبَل من يسمون أنفسهم أقباط المهجر ويدَّعون أن الأقباط مهضومى الحقوق فى مصر

أتذكر يوما كنت مع صديقتى النصرانيه فمازحتها قائلة .. سأسابقك أنا لشراء السندوتشات وأقف أمامك .. (بما إن حقوقكم ضايعه هنا) وطبعا كنت أمزح لا أكثر

لكنى فوجئت برد حقاً ألجمنى

فقد قالت لى الكلمه التى بدأت بها القصيده

هؤلاء الناس أغبيا

لو فكروا انهم يهدوا مصر

ببساطه القنبله اللى هتقع على دماغنها مش هيتكتب عليها تجنب المسيحى وأصب المسلم وإنما سيعم البلاء الجميع

وبعدين المسيحين مش واخدين ححقهم فى مصر محدش يقدر ينكر ده .. لكن المسلمين كمان مش واخدين حقوقهم ولا أى حد معندهوش ضهر

م الأخر كلنا فى الهوا سوا

أقسم لك أخى الفاضل أن كلماتها بقدر ما أعجبتنى .. ألجمتنى

وكم كانت محقه حد الحق فيما قالت .. وهذا هو أوان إثبات ذلك


أسعدنى نقاشك وتعليقك

دمت فى حفظ الله

Wise said...

السلام عليكم ورحمة الله وبركاته
ابدعتى
ابدعتى
ابدعتى
فكرا ومضمونا وطريقه عرض
بسم الله ماشاء الله
رووووووووعه يامها
وربنا يوفقك دايما

Wise said...

اه نسيت اعلقى على الصورة
معبرة جدا تستاهلى 20
من 10 عليها

Mohamed Elsayed said...

تحياتى بجد على الشعور الجميل ده

و الاحساس بالارهاب الخارجى الدخيل على مجتمعنا

فى عز لحظات الحزن ... تأتى بكلمات معبرة على احزانا

فعلا كل المصريين تاثروا بهذا الانفجار المسلم و المسيحي

المسلم و المسيحى هم عمود هذا المجتمع فى منزل واحد فى

المدرسة و الجامعة و الشغل و الجيش

هم حما هذا الوطن

و اود ان اشير الى ان صاحب فكرة عبور القناة فى حرب

اكتوبر 1973 هو

مهندس مسيحى من هنا اتمنى منكم جميعا توجه التحية له

لذا فعلا كل من تسول لهم نفسهم فى زعزعة و استقرار

مصر العظيمة اغبياااااااااااااااااااااااااااااا

فقد حفظ الله مصر على مر العصور

و لكن يجب ان نقف جميعا يد واحدة فى وجه هذا العدوان

و الارهاب و نضرب بيد من حديد على كل من يريد هدم

هذا البلد

اتمنى لكى سنة جميلة بعد هذا التوتر

و ربنا يوفقك و تعيدى البسمة لكل قرأئك

أشبال أون لاين said...

موضوع جميل جداً

وكلامات أجمل وأحسن

وربنا يخلية في ميزان حسناتك

بصراحة أنا أتأثرت بيه

وبحييكي علي إختيارك للصورة المناسبة

وهي أفل صورة معبرة عن موضوع زي دا

و.....
يشرفني أن أري بصماتك الجميلة بل الروعة

في مدونتي

تحياتي

سلسبيل said...

سلمت يداك اختى
و حفظ الله مصرنا الحبيبة

مها البنا said...

wise

يا سلااام على الحماس فى المديح

أثلجتى قلبى :D

أما عن الصوره .. فهو ده فعلا اللى بيحصل

لكن أنا مازلت متفائله .. من إنهم مش هيقدروا يفرقونا

حاولوا كتير وفشلوا .. والمره دى مش هتكون أحسن من اللى فاتوا بالنسبه ليهم

قولى يارب

مها البنا said...

أستاذ محمد السيد

أخبرنا الرسول الكريم صلى الله عليه وسلم أن أهل مصر فى رباط إلى يوم القيامه .. وهو صلوات ربى وسلامى عليه لا ينطق عن الهوى

شكرا للإضافه

دمت على خير

مها البنا said...

أشبال أون لاين

جزاك الله خيراً على الدعاء ولك بمثله وخير منه

وأكيد يسعدنى أزور مدونة حضرتك

دمت فى حفظ الله

مها البنا said...

سلسبيل

اللهم أمين

نورتى يا قمر

Timo.. said...

تدوينة بسيطة تدخل القلوب بسرعة..
واجمل ما عجبني العنوان :)
ربنا يحفظ مصرنا من كيد الكائدين.

وجع البنفسج said...

ربنا يحفظ مصر واهل مصر من الفتنة الطائفية ، بظلوا اخوة ابناء شعب واحد وارض واحدة ،،سواء مسلمين او مسيحيين ، بالنسبة لما كتبتيه فهو كلام رقيق يدخل القلب مباشرة ، تقبلي مروري ودمتي بعز ..

مها البنا said...

Timo

العنوان هو ملخص كل الكلام

المهم هل من قارئ؟

دمت فى حفظ الله

مها البنا said...

وجع البنفسج

اللهم أمييييييييين يارب

نورتى المدونه :D

mrmr said...

ربنا يحافظ على بلادنا ويسترها
ويديم المحبه فى قلوبنا
كلمات جميله ي مها
تسلم ايديك

MR.PRESIDENT said...

اختي العزيزة مها بعيدا عن الموضوع عبال بس ما يتم تفعيل " تمرة " أقترح كتاب " عصر العلم " إيه رأيك عبال ما تبقي الكتب بالترشيح أو هنشوف نظام كل المشتركين يتفقوا عليه .

مها البنا said...

mrmr

أمين يارب .. سعيده بمرورك

ومهما عملوا .. هتفضل مصر هى مصر .. بكل اهلها

إيد واحده

وفى رباط الى يوم القيامه

مها البنا said...

Mr. president

ان شاء الله معاكم .. وأتمنى تكون فرصه نحيى بيها ثقافتنا ونوسع مداركنا ونعود بها للقراءه من جديد

بارك الله لك وجعله فى ميزان حسناتك وحسناتنا

امين

محمد الجرايحى said...

الأخت الفاضلة/ مها
أحسنت ..وصدقت
عندك حق ..وماأكثر الأغبيا

مها البنا said...

أستاذ محمد الجرايحى

نسأل الله ألا يكون الأغبياء بتلك الكثره الذميمه

شرفنى مرور حضرتك وأتمنى أن تكون المدونه قد حازت على إعجاب حضرتك ولو بالقدر الضئيل

دمت فى رعاية الله