يا خسارة الحب

تعرف لما تحب بجد؟

تهدى كل مشاعرك حد؟

تعرف لما تصون العشره

وتحفظ حبه رغم البعد؟

تعرف لما تكون مع ذلك مانتش عاجب؟

عاوز تبعد .. قلبك رافض؟

تعرف لما تحاول تانى تصون العهد؟

رغم الروح خلاص مش قادره

سكنها البرد؟

تعرف لما تحاول تانى تغلب نفسك؟

يصرخ عقلك

أصله خلاص بقى رافض القرب

عايش فيك بيصارع القلب

رحت وجبت شموع الدنيا

قدت صوابعك نور م القلب

لحد الشمع ما حرق الحب

قلت انا ماشى وطالب البعد

يومها يفوق

يصرخ فيك من عزم الشوق

ارجع ليا بإسم الحب

لكن رغم صراخه ونوحه

شئ جواك بيقولك لأ

طبع الواحد دايما غالب

رجوعك تانى مهوش على حق

وانت خلاص شربت الغلب

يبقى الحل ان انت تغادر

مهما يكون قلبك مش قادر

إمشى .. ومتبصش لجروحه

ولو القلب صحيلك يوم

إكتم بوحه

لأجل كرامتك لازم ترحل

لجل الغد

حتى ان كان التمن ان انت

هتقتل قلب

.

.

.

يا خسارة الحب

عارفه يا أمى؟

 عارفه يا أمى أنا نفسى أرجعلك

نفسى أترمى من تانى فى حضنك

نفسى أزرع وآكل من أرضك

نفسى أشرب من مياة نيلك

وأتغطى فى ليلى بسماكى

نفسى أوطى أبوس إيديكى

وأنول رضاكى

وفى النهايه أخطب ودك

لكن يا أمى كل ما أعود

أشوف دماكى ماليه سدود

وأشوف خراب الأرض البور

والنيل هناك محبوس فى قيود

أشوف لصوص سارقين خيرك

وحضنهم إدوه لغيرك

وكل ما نصَحِى ضميرك

يموتوه بضربة مدفع

والأسعار على طول تطلع

والناس بتجرى على حالها

تخاف من اللى هيجرالها

مساكين وبتربى عيالها

متسلسلين بمشاكلها

واكتشف ان بعادك

النار فيه ارحم من قربك

وان غربة ليلى هناك

اهون ما اعيش شاربه فى زُلِك

حقيقى انا نفسى ارجعلك

لكنى هفضل هنا عايشه

احسن ما اموت وانا فوق أرضك

حنفى البقال

شفت الواد حنفى البقال عايش عمره وعال العال

يصحى الصبح يرش المياه ويطلب شاى من عبد العال

يدعى بصوته العالى يارب .. حلى أيامنا برزق حلال

يوم والتانى وحنفى قصادى بايع الدنيا بروقان بال

كل الناس على طول بتحبه .. ووقت الشده واقفين جنبه

واد على حق محدش غلبه .. مهما اوصف بكلامى محال

اوصف واحد كل حياته صاحب صاحبه وفى صلواته

داعى للخلق بحالوا يعيشوا عيشه هنيه بلا إشكال

دقنه جميله ريحتها الطيبه متظبته متساويه تمام

بسمه رقيقه على محياه .. تسعد فعلا لو ترآه

أمه بتدعى فى كل صلاه ربى يصونه ويرُوقله الحال

صاين امه وحافظ دمه وراعى لحق الجار والدار

نفسى فى يوم لو زوجه تصونه .. يوم ترعاه ويحفظها بدوره

والذريه الصالحه تكونلوا من ضمن الرزق المتقال

واد على حق تشوفه هتفرح .. دينه أفعال مش بس كلام

ربى يصونه يارب بكرمه ويقدره فى رعاية امه

ويديله على اد ما عمله طبق فيه دين المتعال

الاسلام ياخوانا بجد مش كلمات بالصوت تتقال

ولا صوره لقفطان متقصر ولا دقن صاحبها محتال

ولا بنقاب هظلم من لبسه .. وأقول ده راجل وهيسرقنى

أو ست وهتخطف ولدى أو هربان من حكم الأبدى

وأفضل قاعد فكرى يودى انه اكيد فى رصاصه هتضرب

وان الدنيا فى لحظه هتقلب والشرطه هتيجى وهتاخده

وهى يا عينى بنت رقيقه حبت يوم م الرب تقرب

يبقى جزاتها نظره حقيره ؟ حوش عنها يارب يا ستار

واحفظها نظر الجُهَّال

الإسلام وف اجمل صوره .. إن الواحد يحفظ نفسه

يراعى الرب طبيعى فى عمله

ويهاب من رب الأعمال

مش من صاحب الشركه بتاعه ولا بينافق لجل متاعه

يبقى كتير ومرتبه يعلى .. بالذل وسوء الأعمال

إغضب

إغضب وثِر لهيب النار وحطم الأشياء

وأنزع عن قلبى ما استطعت

من معانى الحب وآيات الوفاء

كم قد جُبِّل هذا الضعيف على النقاء

على حب الخير وانكار الرياء

لكنه ما اعتاد أبدا فى حياته

تَمَلُّك الأشياء

فأغضب ...

إغضب وحَرِّق ما تبقى فى ثنايا القلب من صفاء

فحتى الحب يا صديقى إذا ما وُلد أحمقا غِرّاً

فمصيره للهواء

فأغضب ...

إغضب وبنار الغضبُ منك سيكتوى كلينا

ورماد الحب بداخلنا سيستحيل هباء

فاغضب

فبغضبك صرت رجلا

وبألمى تسوقنى للفناء

أتدرى يا عمرى لما القلب يذبل أحيانا

ولما يرفض البقاء؟؟

لأنه لا يحمل الكبر بين جنباته

لكنما زرعت به منذ الصغر

أسمى معانى الكبرياء

وهو ما لا يكون بفائده

لذوى النظارات السوداء أومتبعى الأهواء

فبحق من جبل القلوب على المحبة والوفاء

لو عاد بى عمرى للحظه

عاما وحيدا للوراء

صدقنى لما إتخذت حينها أبدا

تلك الخطوة الحمقاء

فأغضب ...

ولنرى الى أين سيمضى بنا الغضب

والى متى سنحتمل الشقاء

صورة الشقا

قعد الألم ويا القلم فى يوم كدا قعدة سمر

ده يحكى وده يشتكى .. وكل يوم هم وكدر

قال الألم: مخنوق خلاص

صاحبى شايلنى جوه قلبه

وكل يوم عليه بينداس

لازم أفارقه خلاص بقى

صعبان عليا كتير يا ناس

لكنى كل ما أقول أهاجر

ألاقى جرح جديد يعافر

يصرخ في ضميرى ويقولى:

إرجع هنا .. شوف شغلتك

محتاجين لنغزتك

لجل ما يصحى فى قلب صاحبنا 

وجع جديد من شدتك

وقف القلم وخط خط

ورد قال: فاهمك بجد

لكن صاحبى غريب قوى

ساعة الألم بحس إنه

من دمع حبرى بيرتوى

يكتب ويحكيلى أنا

سره اللى من وجع الزمن

أصبح رزين

وبسببه بقى صاحبى أنا

دمه تقيل ومنطوى

سمع القمر وجع الألم

صرخ القلم

قام قال كفايه دانا خلاص

من كتر ما صاحبكم سهر بيبصلى

وجهه حزين وملتوى

بقيت بطلتى عليه كل مسا انا مغتوى

ونفسى مره بجد أشوفه

ببسمه حلوه وطيبه

ويحطنى مره فى كفوفه

مع ضحكه من زمن الصبا

وقلبه أخضر مرتوى

لكن صاحبنا فى يوم رجع

مسك القلم

جه يكسره ..

إستخسره ..

فرماه فى درج مكتبه

وحط إيده ع الشباك وقفل دروفه

منع القمر خالص يشوفه

والصبر علقم طعمه مر فى حلق جوفه

وفرد جسمه على السرير وعقد كفوفه

وساب نفسه مات

فلو حبيت مره فى يوم

ترسم ملامح للشقا

إخطف رجليك ورحله بيها لحد هناك

روح بس شوفه وصوره

وتعالى تانى من سكات

همسات 2

مينفعش القلم يسكن

مينفعش نسيبه ينزف جواه من غير صوت

لازم نحطم كل أنواع السكوت 

ونلحق أقلامنا بسرعه .. أحسن تمووووت

سُنة حياتنا وبيها كلنا راضيين
يكون الفرح بالأيام والحزن دايما بالسنين
عجبى على قلوب من عِزم الفرح ماتت
وقلوب كتير من حزنها عايشين ميتين

  

يارب برحمه من رحماتك إرحمنى وإحمينى

وشيل عنى وعن إخواتى من دمى ومن دينى

يزيد عمر الفرح عندى وتزهر سنين عمرى

وينور هداك فى القلب وتجفف دموع عينى

  

ياما نفسى مره أفرح بجد وبحق وحقيق

أشوف الناس معدن نضيف مش ليه بريق

وأرجع أعيش بقلب صافى نقى ورقيق

وأعرف أميز العدو عن الصديق

  

من كتر ما جوايا كلام كتير ورافض تسمعه

من كتر ما يكون الغرام فى القلب ذنب بيوجعه

من كتر ما إحتجت الأمان ولقيت الخوف بيضيعه

خايفه أما ترجع أكون خلاص 

.

.

.

 جثمان والناس بتشيعه

  

إتولد على فرش دافى والحبايب فى كل جانب

ومر العمر ، وإشتد السواعد

والمنافع والمقاصد خلوا نفس الفرش بارد

قام مدد على الفرشه .. وساب عينيه من تانى نامت

  

لو كانت الدنيا سيف ونصله فوق رقابيا

ولو كان الزمان سياف بسيف لامع على عنينا

وكانت النهايه خلاص مكتوبه بأسامينا

برضه مش هنستسلم .. وهنغير ده بإيدينا

  

 

الحزن ساكن فى القلوب ومتربع

والخطوه ماشيه فى الدروب محتاره

عجبى على ناس من كتر الهم منهاره

وناس كتير الحزن جواها لكن مجدع

هو أنا ليه مش قادره أضحك؟

هو أنا ليه مش قادره أضحك؟

مش عارفه أفرح .. ولا حتى أبتسم؟

كل اما اقول الفرح زار بابى

ألاقى الحزن فوق ملامحى بيترسم

كل أما أحاول احط بسمه فوق شفايفى

يخونى دمعى وأحس نفسى بتتقسم؟

هو أنا ليه مش قادره ابتسم؟

دايما بحس الدنيا دى مش دنيتى

جيت فيها عافيه والطريق مش سكتى

ولا ليا صاحب كان أمين غير دمعتى

ولا ليا غير نبضه فى قلبى تمدنى

شريان حياه لحد ما تحين عودتى

الفرحه ليه مش عاوزه تيجى تودنى؟

كل أما أعدى بحار أغرق و غيرها يهدنى

هو الحياه مستمتعه بكسرتى؟

ولا الهموم من شرعها ودى قسمتى؟

مش عارفه !!!

لما حلمت

لما حلمت !! حلمت أكون

بسمه كبيره وفرح عيون

نسمه ولمحه فى قلب حنون

لما حلمت !! حلمت أعيش

زى الطير بجناح من ريش

يوم فى الأرض ويوم فى السما

وإن جروحى متقتلنيش

لما حلمت !! حلمت بإنى

واخده الدنيا وأهلى فى حضنى

عايشه ما بينهم بهزم حزنى

وفى أحضانهم أبكى وأرمى

كل همومى من على كتفى

لما حلمت !! حلمت بزهره

ورده تفتح علشان بكره

وأزرعها فى أيامى وعمرى

فاتنبت لى أجمل شجره

وترجعنى لدنيا الشعرا

لما حلمت !! حلمت كتير

وعدى العمر وصرت كبير

وعرفت إن الحلم يا دنيا

مهما حلمته وعيشته وشفته

يفضل حلم وصعب أطوله

وإتعلمت فى حلمى الحكمه

وعرفت الصبر على أصوله

علشان كده أنا هحلم تانى

وأصبح أنام عايش أحلامى

يمكن يوم واحد يتحقق

حلمى وأعيش أحلام غيره تانى