Thursday, May 13, 2010

همسات 2




مينفعش القلم يسكن
مينفعش نسيبه ينزف جواه من غير صوت
لازم نحطم كل أنواع السكوت 
ونلحق أقلامنا بسرعه .. أحسن تمووووت


سُنة حياتنا وبيها كلنا راضيين
يكون الفرح بالأيام
والحزن دايما بالسنين
عجبى على
قلوب من عِزم الفرح ماتت
وقلوب
كتير من حزنها عايشين ميتين
  



يارب برحمه من رحماتك إرحمنى وإحمينى

وشيل عنى وعن إخواتى من دمى ومن دينى

يزيد عمر الفرح عندى وتزهر سنين عمرى

وينور هداك فى القلب وتجفف دموع عينى
  


ياما نفسى مره أفرح بجد وبحق وحقيق
أشوف الناس معدن نضيف مش ليه بريق
وأرجع أعيش بقلب صافى نقى ورقيق
وأعرف أميز العدو عن الصديق
  


من كتر ما جوايا كلام كتير ورافض تسمعه
من كتر ما يكون الغرام فى القلب ذنب بيوجعه
من كتر ما إحتجت الأمان ولقيت الخوف بيضيعه
خايفه أما ترجع أكون خلاص 
.
.
.
 جثمان والناس بتشيعه
  


إتولد على فرش دافى والحبايب فى كل جانب
ومر العمر ، وإشتد السواعد
والمنافع والمقاصد خلوا نفس الفرش بارد
قام مدد على الفرشه .. وساب عينيه من تانى نامت
  


لو كانت الدنيا سيف ونصله فوق رقابيا

ولو كان الزمان سياف بسيف لامع على عنينا

وكانت النهايه خلاص مكتوبه بأسامينا

برضه مش هنستسلم
.. وهنغير ده بإيدينا
  


 
الحزن ساكن فى القلوب ومتربع

والخطوه ماشيه فى الدروب محتاره

عجبى على ناس من كتر الهم منهاره

وناس كتير الحزن جواها لكن مجدع

10 comments:

Anonymous said...

هوه ليه الأحزان بقت تغمرنا غمر
واللحظات الحلوة بتمر بينا مر
والواحد فينا بقه خلاص مهموم
ومن كتر همه عينيه مبتشوفش النوم

مها البنا said...

يمكن عشان هو ده حكم القدر
مكتوب علينا نعيش هنا مهما حصل
لحد ما يحين عمرنا نرتاح فى يوم ما نحتضر
ونسيب الأرض باللى فوقها
ونعيش هناك
فوق القمر

Noha Saleh said...

حزينة اوى بس حلوة اوى
لو كانت الدنيا سيف ونصله فوق رقابيا

ولو كان الزمان سياف بسيف لامع على عنينا

وكانت النهايه خلاص مكتوبه بأسامينا

برضه مش هنستسلم .. وهنغير ده بإيدينا

ربنا يوفقك

kalimpo202 said...

بصراحة جميل فيها احساس ما شاء الله

مها البنا said...

نهى .. ربنا يباركلك على الدعوه ويوفقك يارب

هو السمه الغالبه على المدونه الحزن .. لكن ده مش من كتر الأحزان .. ده بس عشان صاحة الفرح بكون صاحبه ندله وبنسى القلم ههههههه

مها البنا said...

أستاذ مجدى .. الحمد لله انها عجبت حضرتك

هو الحقيقه مش بكتب شئ غير لما بحسه

واكيد ما يكتب بإحساس لا يملك الأخرون إلا الشعور به

بارك الله لك

هبة الله الهادى said...

WooooooooooW
رغم انها حزينة جدا بس بجد احساسها عالى قوى وصادقة قوى

مها البنا said...

بزمتك يا هوبه .. فيه إيه مش يدعو للحزن؟؟
اللهم لك الحمد على كل شئ
هى فعلا صادقه .. لإنها حقيقيه

وحشتينى يا هبه

do3aa said...

الحزن صاحب وصديق عرفته من زمن بعيد
قاعد ومتربع ومطفي نور كل العوااميد
بس عادى ده بقت صحبته رحمه اكتر من العبيد
على الاقل اهو ساكن ولا بيضرب ولا بيخون بقلب حديد


جميله يا مها

بكل كلمه فيها

بكل رباعيه

ماشاء الله عليكي

مها البنا said...

دعاااااء

الحزنن صاحب أه لكن صحبته بتوجع

مطفى نور حياتنا وم الوجع ندمع

لكن على قولك اهو أرحم من كل من يخدع

حزن ومعروف مكانه

مش صاحب ندل بايع

ولا خالع عن وشه البرقع


جميل إحساسك بالكلمات والأجمل ما خطه قلمك الجميل

رااائع بجد