Thursday, September 15, 2011

ولسه ...


لسه مازال فى القلب النبض
ولسه خيالى ملهوش حد
لسه بقول للدنيا يا دنيا
أنا واقفه وعمرى ما هتهد
مش عارفه أنا كده لمضه لمين؟
ولا عنادى واخدنى لفين
بس أنا عارفه إن أنا عايشه
وحياتى فيها ناس تانيين
ناس علشانهم أنحت صخر
وأضرب أغوص أعماق البحر
وأطلع ماسكه فى إيدى الدر
لجل عيون أغلى الغاليين
أول مره مخافش عليا
وقت ما شفت الموت بعنيا
خفت عليهم
غصبن عنى قلبى هجرنى
وطار حواليهم
شفت دموعهم جوه عنيهم
بس الحمد لله على كرمه
ربى ستر وشملنى بحلمه
وبكره هقوم زى الجنيه
بضحك وأملى الدنيا سعاده
كلى أمل وحياة وإراده
صبرك بس يا دنيا عليا
هى دقيقه  
.
.
.
شويه وجايه

23 comments:

موناليزا said...

حلوة يا مها :)
ربنا يبعد عنك أى شر يا حبيبتى

ناصر أبوالخير said...

قصيدة رائعة

Anonymous said...

الله حلوه أوي بحب روح النعاد و التصميم و بحب اللا يأس.
رائعه عزيزتي و إحساسها واضح
أرق تحية لكي :)

شيرين سامي

مها البنا said...

موناليزا

ربنا يخليكى ويتقبل منك الدعاء يارب

مها البنا said...

ناصر ابو الخير

الحمد لله انها عجبتك

نورت المدونه

مها البنا said...

شيرين سامى

ربنا يباركلك يا قمر .. هكذا يجب ان نكون ولا ندع مجال لليأس فى حياتنا

الحمد لله على نعمه

أسعدنى جدااا مرورك

Anonymous said...

السلام عليكم ورحمة الله وبركاته
ما اجمل روح التحدى
التى تتحلى
بهاقصيدتك
الاكثر من رائعه
دمتى دايما متحدية
دايما قوية

مها البنا said...

Wise

عليكم السلام ورحمة الله وبركاته

التحدى أروع من كل شئ .. تسلميلى يا قمر ويسلملى وقوفك جنبى وقت الشده

وجع البنفسج said...

لسه مازال فى القلب النبض
ولسه خيالى ملهوش حد
لسه بقول للدنيا يا دنيا
أنا واقفه وعمرى ما هتهد

فيها عناد وطموح

اعجبتني كثير كثير

فيها حاجة بتشبهني

مها البنا said...

وجع البنفسج

التحدى والرغبه فى الإستمرار .. هى الشئ الوحيد الذى يجعل بداخلنا الأمل فى غد أفضل

لازم يكون فيها منك كتير .. عشان كلنا عندما الأمل إن بكره أحلى:)

Carol said...

حلوة قوي :))
فيها من روح صلاح جاهين :)

مها البنا said...

Carol

صلاح جاهين مره واحده؟؟ أنا فين وهو فين ...

أسعدنى جدا مرورك يا قمر :)

Anonymous said...

It is wonderful, I like it! Tamer

مها البنا said...

Tamer

أنا فرحانه قوى انك متابع ..

وسعيده اكتر انها عجبتك :)

نورت المدونه يا احلى اخ

عازفة الالحان said...

لحروفِك إحسآآسْ جذآبْ فِي بسآطِته .,

سأعود دوماُ هُنآ .,

دمتِي بخير

واحد من الناس said...

حلوه أوي

كلماتك عذبه ، ودافئه


تحياتي :)

مها البنا said...

عازفة الألحان ..

ألف شكر لتشجيعك .. نورتى المدونه :)

مها البنا said...

واحد من الناس

جزاك الله خير


نورت المدونه :)

قهوة بالفانيليا - شيماء علي said...

ماتبطليش :)
انتي بتكتبي ليه على فترات متباعدة كدة !!
الكتابة زي البيانو
لو بعدتي عنها كتير .. هتلاقي صوابعك تقيلة فيها ..
اكتبي كتير
اكتبي على طول
:)

مها البنا said...

شيماء ..

بحاول صدقينى .. بس مش عارفه ليه قلمى مهنج

أكتر من مره افكر أكتب ومقدرش .. كأن فعلاً صوايع إيدى متجمده

عموما هحاول اسمع كلامك وانزل بوست قريب

قولى يارب :)

Ahmed HeRo said...

رائعة جداا جداا تسلم ايدك

مها البنا said...

Ahmed Hero

الحمد لله إنها عجبت حضرتك

نورت المدونه :)

Ahmed HeRo said...

المدونة منورة بأصحابها