Sunday, December 26, 2010

البراءه


البراءه
البراءه ورده صافيه
لونها أبيض .. لونها أحمر
أى لون ينفع يكون
المهم الورده ديه ..
عمرها ما تعرف تخون
البراءه
البراءه طفل صغير
بنت جميله
البراءه ضحكه حلوه
معقوده على فم الفضيله
البراءه
البراءه لما تصحى
تلقى كل الناس بعيد
القريب منهم بيسهى
عن وداعك لو تغيب
والحبيب يومها اللى ظلمك
معتنق دور الشهيد
والبعيد منهم أنانى
رافض إنه يسيب خيوطك
يومها تبكى بعزم صوتك
وبعد ترجع من جديد  ..
باسم الصداقه
البراءه
البراءه لما تسمع صوت ضمير
لما تبص جوه منك تلقى خير
لما تمشى فى ليله ضلمه وقلب نور
يومها تقدر بيها تعبر البحور
تلقى ع الشطآن هناك فرسان وخيل
والأمير .. منتظر سندريلا مع الغفير
البراءه لو تصدق ان ده شئ مش محال
وان فعلا لسه جوه القلب رحلات للخيال
وان بكره جاى أحلى وعمره ما بيجى يا خال
البراءه لما تحلم
ولما تصحى من جديد
تلقى برد شديد فى فرشك
والنفيس زى الحديد
وبعد كل ده تصدق
إننا فى دنيا جميله
دنيا زى ألف ليله
لكن من غير العبيد
البراءه يا صاحبى كلمه
ليها ألف وألف معنى
البراءه يا صاحبى فكره
حاجه كده ملهاش كيان
كلمه بيقولها اللسان
لما يوصف حد أهبل
ميعرفش يعيش الزمان.

19 comments:

هبة فاروق said...

البراءة شىء جميل نراة فى عيون الاطفال ونجدها شىء نادر فى عيون الكبار وبالفعل كما ذكرتى عندما نجدها فى عيونهم نقول عليهم سذج لان الانسان عندما يكبر تضيع معنى اليراءةبداخلة نتيجة ما تحفرة المقاسى والانكسارات والهموم بداخلة
كلمات فى منتهى الروعة والجمال
حقا ابدعتى ووصفتى البراءة بمعانى ومفردات جميلة
مشكور حبيبتى تقبلى تحياتى لقلمك الجميل

Unknown said...

حلوه أوي أجمل كلام عن البراءه اللي بقت مظلومه في زمنا ده
تحياتي لك و سلمت يداكي

مها البنا said...

هبه فاروق

ورغم ذلك تظل الكلمات عاجزه عن وصف البراءه

لكن مالا يوجد فيه شك ، هو أنها أختفت من داخلنا منذ قديم الأزل ولا تستطيعين رؤيتها الا فى نظرة طفل (رضيع) .. تفتكرى ايه السبب؟

مها البنا said...

شرين سامى

إن كانت البراءه مظلومه

فبيدنا لا بيد أحد أخر

نورتى المدونه وأسعدنى انها أعجبتك

Anonymous said...

البراءه فى الاطفال صفه جميله
البراءه للكبار تكون لمن لا ذنب عليه و تمنح من الناس لنصره مظلوم
و ما اعظم البراءه التى تمنح من المولى عز وجل
Tamer Elbana

Magdy Hatem said...

جميلة جدا الكلمات
وبجد بتوصف كتير من معاني البراءه
لكن المشكلة ان البراءة غابت في زمانا
وما بقتش موجوده غير في الاطفال والقليل جدا
من الناس

♥ ♥ Amira Samy ♥ ♥ said...

أختى مه بجد كلام جميل عن
البراءة تسلم اناملك أختى

Casper said...

كلمات جميلة ووصف رائع للبراءة
في انتظار المزيد من الابداعات

تقبلي مروري
Casper

مها البنا said...

Tamer Elbana

أصبت جداااا

اللهم إنا نتبرأ اليك من ذنوبنا فتب علينا إنك أنت التواب

أسعدنى جدا مرورك يا تامر وفرحت بيه بجد

إبقى تعالى تانى :D

مها البنا said...

أستاذ مجدى حاتم

فعلا .. مشكلة البراءه إنها عابت عن قلوب الكثيرين الا من رحم ربى

أسعدنى مرور حضرتك والحمد لله ان الكلمات أعجبتك

دمت على خير

مها البنا said...

سلسبيل

نورتى يا ست البنات ويارب تكونى أحسن دوقتى

إبقى تعالى تانى :D

مها البنا said...

Casper

جزاك الله خيرا على الإطراء والحمد لله الذى وفقنى لإختيارها

نورت المدونه

إبن النيل said...

السلام عليكم
والحبيب يومها اللى ظلمك
معتنق دور الشهيد
والبعيد منهم أنانى
رافض إنه يسيب خيوطك
يومها تبكى بعزم صوتك
وبعد ترجع من جديد ..
كلماتك جت علي الجرح غللي مش عاوز يندمل أو يبطل نزف
رائعة هي كلماتك
دمتي بكل خير

مها البنا said...

إبن النيل

كلماتك أصعب كثيراً .. حقاً أتأسف على ما أثارت كلماتى بنفسك من ألم .. وأسأل الله الكريم أن يصرف عنك السوء .. أمين

مونتي بوكيه ورد said...

ما اجمل البراءة
ماشاء الله عالمك رائع

مها البنا said...

مونتي بوكيه ورد

ليس عالمى هو الرائع

بل العالم البراءه الذى اختفى من زماننا هذا

نورت المدونه

دمت فى حفظ الله

Unknown said...

البراءة جمالية لا يتقنها و لا يقدّرها الاّ ذوو القلوب الطيبة و اللملوءة حبّا و ايمانا ...

تقديري

صاحب الزمن الجميل

أحمد سعيد said...

فكرة الموضوع وصياغته بأجمل لحن وأجمل نغمات اكثر من رائعة احييكى عليها لانه ده العادى او الطبيعى بتاعك تسلم ايدك وفى ابداع دائم

مها البنا said...

Ahmed HeRo

الحمد لله انها عجبت حضرتك .

جزاك الله خيرا على الشجيع والمتابعة :)