Saturday, September 4, 2010

حكاية صبيه


بعد السلام .. بعد التحيه وبعد كل كلام ممكن نبدى بيه
جايه أحكيلكم حكايه عن صبيه صغيره وبشعر أبيض
عشقها ترضى الكريم وتتبع سنة رسوله المصطفى أحمد
ليها طموح زيها زى البنات من سنها
والنجاح والتميز كانوا هما حلمها
وقفت مره فى وش الزمن بتصارع العقبات
يوم يهزموها وألف مره تغلبها بثبات
ومن سكات ...
جه من وراها سهم غادر وانغرس فى ضهرها
سهم مسموم من زمان القهر صفى دمها
لمعت عينيها بنظره عجيبه عجزوا كتير عن فهمها
وبصت على السهم اللى إنغرس فى ليله ضلمه فى قلبها
لقت دموع الدم منه نازفه كتير
والسهم صوت دمعه وأنينه كان جهير
بيقول بحسره  .. "أنا أسف"
مش أنا اللى بيكى كنت غادر
ولو كنت على انى ما انغرس فيكى قادر؟
"كنت أخطأت الهدف"
بصتله نظرة من عاش الحياه وشاف منها القرف
قالتله كلمة صغيره وبحزن جارف
بإيه يفيدنى عذرك إنتَ وجرحى نازف؟
وبينى وبينكم يا أصحابى الجرح فيها كان خطير
وعرق جبينها بينسحب على ضهرها بهدوء كبير
والملح فى عرقها من كتر الشقى كان كتير
مس العرق جرح الصبيه بكل شده وكل لين
كوى الجراح من كتر ملحه اللى زاد ويا السنين
رغم الألم والكى والنار اللى قادت
لكن الصبيه كات عفيه
وعشان كده من طعنها لم ماتت
فضلت تعاند فى الزمن
تحكى الحكايه تغيظه بيها فى السر وفى العلن
ورفعت شعارها وحدها وقالتها كلمه فى دمها
"أيها الزمن الذى أهدانى يوماً سهم غادر
ها أنا ذا يا فتى
فأقذف سهامك كلها لو كنت راجل
فعرق جبينى وملحى فيه على كويها واللهِ قادر"
.
.
.
خلصت حكايتها يا صحاب
وإنتهى وقت الكلام أو حتى العتاب
لكن فى كلمه صغيره وقبل ما نقول الختام
"إعرق كتير منك لها لجل ما تقدر على صد السهام"
وصلوا على سيدنا النبى .. عليه الصلاه
وكل السلام
.
.
.
سلااام

33 comments:

عمرو يسرى said...

جميله جدا كلمات اكثر من رائعه واحساس ومعنى لا يوصف
ولكن بعض الجمل لى ملاحظات عليها ارجوالا تغضبك ملاحظاتى
الجمله الاولى ولو كنت على انى مش انغرس فيكى قادر؟
احسست بان كلمه مش انغرس ثقيله شويه واحسست ان لو كانت ماانغرس
تكون افضل
الجمله الثانيه
وعشان كده من طعنها لم ماتت
اعتقد ان الجمله
تكون افضل لما تبقى
لم تمت

انتهت ملاحظتى وارجوا الا تغضبك
وعلى فكره انا مش متخصص يعنى انا مش بصحح عليكى
ولكنه مجرد راى

شموخ مسلمة said...

عليه الصلاة و السلام
حلوة اوووووى بجد
احساسك رائع ..
و الجملة الاخيرة كمان ربنا يعيننا و نعملها

مها البنا said...

أستاذ عمرو يسرى

الحمد لله إن المعنى والإحساس وصل لحضرتك

وأنا متشكره جدا على إهتمامك بتوصيل وجهة نظرك

الحقيقه إقتراح حضرتك بتغيير "مش أنغرس" لكلمة " ما انغرس " أكتر من رائع وتظبط الوزن كتير

متشكره جدا على الإقتراح

تقبل إحترامى

مها البنا said...

شموخ مسلمه

الإنسان من غير إحتكاكات ومعتركات وتعب وشقى وصد ورد ووجع مخاض .. بيكون قليل الحيله وضعيف ومش قادر يقف فى وجه العقبات ليكون ذاته

من أجمل المنح التى ترسل إلينا فى المحن .. هى تعودنا على تلقى الصدمات وتعلمنا كيفية صدها

نورتى يا قمر

متحرمنيش من طلتك :)

ابراهيم رزق said...

خوض معركتها زى جدك ما خاض
صالب وقالب شفتك بامتعاض
هى كده متنولش منها الامل
غير بعد صد ورد ووجاع مخاض
عجبى

هى كده الحياه خلق الانسان فى كبد ويقاس نجاح الانسان فى الحياه بمقياس صموده لها
بوست رائع رغم ان ما انغرس نظبط القافيه افضل من مش انغرس الا انى افضل مش انغرس لانه تعبيرك التلقائى
نقبلى تحياتى
ابراهيم رزق

sendbad said...

عليه افضل الصلاة والسلام
ربنا يجعله في ميزان حسناتك
احييكي لهذا الموضوع الهادف
تحياتي

Anonymous said...

عليه افضل الصلاة والسلام
اكثر من رائعة يامها يسلم قلمك ياقمر ويارب دايما فى تقدم
هبة الله الهادى

مها البنا said...

أستاذ إبراهيم رزق

فعلا الإنسان قيمته تقدر بقيمة ما تحمله من صعاب ومدى تجاوزه لها

وسعيده إن البوست عجب حضرتك ولله الحمد

وبالنسبه للتعديل .. فلولا إختلاف الأذواق لبارت السلع

سعيده بمرور حضرتك

تقبل إحترامى

مها البنا said...

أستاذ سندباد

الحمد لله الذى هدانا الى هذا

بارك الله لك

تحياتى

مها البنا said...

هبه

وحشانى يا قمرايه

الحمد لله انها عجبتك

وابقى طمنينى عليكى :)

Noha Saleh said...

انتى كنتى فين ماتغيبيش كده تانى
عجبتنى كلمة دموع الدم فيها تعبير حلو رغم حزنها
لو كل واحد يتعب فى اللى بيعمله وبيتعلم منه اكيد هيقدر يواجه اى حاجة بإذن ربنا طبعا
جميلة التدوينة وماتغيبيش تانى

مها البنا said...

نهى صالح

أنا تحت النظر يا قمر

فعلاً يا نهى .. لازم نتعب قوى عشان نقدر نواجه اى حاجه بإذن الله

الحمد لله ان التدوينه عجبتك

متحرمنيش من مرورك يا نهى

حقيقى بفرح لما بنقرا ردك او اى بوست جديد :)

do3aa El-Shoprawy said...

السلام عليكم ورحمة الله تعالى وبركاااته

مهااا

لن أصف لك مدى اعجابي بقلمك لانك تعلمين مدى عشقي له

كل اللى اتمناه انك متبعديش ابدا عن قلمك

وافتكري دايما انه هو اللى جمعنااا

يا تري فاااكره؟؟

اكييييد فاااكره ابدا لانها بجد كانت اجمل صحبه ف حياتى

وطبعا مش هتكلم ع التدوبنه اصل شهادتى زى ما بيقولوا محجروحه
فهو انتى ...انا

ربنا ينعم عليكي دايما وتمعتعينا

أحبك ف الله
وكل سنه وانتى طيبه
عيد فطر مبارك علينا ( عشان اكون اول واحده تهنيكي بالعيد )

قهوة بالفانيليا - شيماء علي said...

حلوة اوي يا مها
الطريقة دي في الكتابة صعبة جدا :)
عارفة طريقةالحكواتي بتاع الربابة ؟؟
طريقة جميلة و شيقة جداً في الحكي
برافو اوي يا مها
كل سنة و انتي طيبة

يمين فى يمين said...

السلام عليكم

عرفت من التعليقات ان اسمك مها

حقيقى كلماتك جميلة اوى يامها

لكن مش اى حد يكتب بنفس طريقتك كدا

من الصعب

عمتا كلماتك جميلة ومدونتك اجمل

اسمحيلى دايما بالمرور


يشرفنى زيارة مدونتى

أم الخــلـود said...

اصحى يا نايم ووحد الدايم

أرجوا من المدونين الموقرين أن يضعوا شعار الحملة واسمها فقط فوقها

(حملة الجسد الواحد)

في الشريط الجانبي لمدوناتهم كدلالة على وحدة صف أمة محمد

http://dndanh111.blogspot.com/2010/06/blog-post_14.html

ومن أجل قيام الولايات المتحدة الإسلامية

http://dndanh111.blogspot.com/2010/06/blog-post_17.html

جعله الله في ميزان حسناتكم .. آمين

rack-yourminds said...

من عركته الحياة بتجاربها وخبراتها وقسوتها لا يهمه ولا يهزه فيما بعد العواصف الشديده
___________-

كل سنه وانتي طيبه

sendbad said...

كل سنة وانتي طيبة عيد فطر سعيد
تحياتي

مها البنا said...

دعاء

كل سنه وإنتى بألف صحه وخير وسلام

الصحبه الحلوه والأخوه فى الله مش ممكن تتوصف بكلمة (كانت) أبدا ومش ممكن أفتكرها لأنى أصلا مش أقدر أنساها

ربنا يديم علينا الأخوه فى الله

كل سنه وإنتى طيبه مره أخرى

مها البنا said...

شيماء

ربابه؟؟

أهو عشان لو فشلت فى العلم ألاقى شغلانه :)

حقيقى أسعدنى رأيك وتشجيعك

ربنا يباركلك وكل سنه وانتى بالف خير

مها البنا said...

يمين فى يمين

تنور المدونه فى أى وقت

والحمد لله إنها عجبت حضرتك

كل عام وانت الى الله اقرب

مها البنا said...

أم الخلود

رغم إنك تقريبا مش شفتى المدونه

لكن أسعدنى مرورك

كل عام وانتى على خير

مها البنا said...

rack-yourminds

الكلام اللى حضرتك قلته معناه كبير وقيم

نورت المدونه

وكل عام وأنت بخير

Magdy Hatem said...

بوست رائع
فعلا من جد وجد ومن زرع حصد
وده نتيجة التعب
كلمات معبرة
كل عام وانتم بخير

Magdy Hatem said...

كل عام وانتم بخير وجميع الامة الاسلامية
اللهم صلي علي محمد وال محمد كما صليت علي ابراهيم وال ابراهيم وبارك علي محمد وال محمد كما باركت علي ابراهيم وال ابراهيم في العالمين انك حميد مجيد

مها البنا said...

أستاذ سندباد

كل سنه وحضرتك بخير

نورت

مها البنا said...

أستاذ مجدى حاتم

أسعدنى كتير رأى حضرتك

كل عام وأنت والأسره كلها بخير وسلام

وصلى الله على محمد صلى الله عليه وسلم

Alaa Salim - علاء سالم said...

السلام عليكم

بجد كلمات أكثر من رائعه سواء من حيث المعاني أو الأسلوب أو الموسيقى الجميله اللي في الكلام

وكمان الخاتمة جميله جداً وبتختصر المعنى في جمله واحده سلهة وبيسطه
بأشكرك بجد على إمتاعنا بكلماتك الجميله

بنت الاسلام said...

السلام عليكم ورحمة الله وبركاته

ما شاء الله

قصة جميلة جدا وعرضها رائع واحساسها عالى

ربنا يبارك فيكى وتمتعينا بأكثر من ذلك

sendbad said...

ليه الغيبة دي ؟

مها البنا said...

أستاذ علاء سالم

الحقيقه عاجزه عن الرد

حقيقى اشعر بالخجل الشديد

جزاك الله خيراً وأدام عليك نعمة القلم

مها البنا said...

بنت الإسلام

نورتى المدونه

ويارب يبارك فيكى وميحرمناش من طلتك :)

مها البنا said...

أستاذ سندباد

جزاك الله خيراً على السؤال

أنا تحت النظر أهو :)

حالة عجز مؤقته للقلم .. لكن عن قريب نعود بإذن الله