Friday, August 29, 2014

انا وقلبي و.... والغرور


انا اللي لما الدنيا تطلب منها شئ .. بتديها
ولما احتاجت الاصحاب لقلب كبير .. يداويها
لقيتني هناك بشيل عنهم هموم قلبي تعب بيها
ولما تكون هناك فرحة ولمة خير
باكون اخر صديق مدعي
بكون في الزحمة شئ منسي
واعديها
بمزاجي بعديها
عشان اكبر من احزانهم
واعلى كتير من الاوجاع  ومن قلبي ومن غيري
وارجع اداوي كل جريح
مهما كان اليه شعوري
لكنه هناك يقف قدامي ويغيظني
غروري ..  اصله مستني
وكل ما وقعة من الايام توقعني
الاقيه مرمي من الضحكة قصاد مني
وبيقولي
مفيش فايدة
مصرة تعيشي بالاحمال على كتافك
ولا تتعلمي مني
بان الدنيا يا شابة
واخدة الاسم بتدني
من السفلية والواقعة
ومن الغربة ومن الاحزان
ومن كل جراح القلب
ومن الآلام
ابصله برده من اعلى جبل عندي
بنظرة ملكة مش قابلة ..
تبص لتحت ولا لحظة
والاقيني برغم الحزن جوايا
في زحمة من الوجع واقفة
بتدمع عيني وبغني
وبضحك ضحكة ملو الشِفة للشِفة
تسَّمع في حدود الكون من الخفة
وتكتم صرخة جوه حدودي مرسومة
ومكلومة
ومش طالعة
ومتحاوطة
وويا كل جرح جديد
احط عليها قفل حديد
وارجع تاني اسمعهم
ولا اتعلم
ولا يهون حتى على قلبي
في يوم اغضب
واوجعهم ،،،

4 comments:

نيللي علي said...


أنتي إنسانة جميلة

مبسوطة برجوعك للمدونة

انتظر مشاركتك في حملة #لاتهجر_مدونتك
https://www.facebook.com/events/362083823969100/

مها البنا said...

انا اللي سعيدة بتعليقك ..

حلوة الحملة وتبشر بعودة بعض المدونين .. أتمنى النجاح ليها وأكيد هحاول المشاركة :) شكرا ع الدعوة

Anonymous said...

naturally like your web site however you need to take a
look at the spelling on several of your posts.
Several of them are rife with spelling issues and I find it
very bothersome to tell the reality however I will surely come back again.

Feel free to visit my web page home improvement renovation

مها البنا said...

Anonymous

أنا سعيدة جدا بتعليقك لأنه يدل على ان حضرتك بتقرأ باهتمام .. وده احساس رائع

بالنسبة للغة .. فأنا مش عارفة حضرتك تقصد أي مدونة؟؟ (الطير المهاجر .. أم إلى البحر) فالأولى .. أتعمد فيها الكتابة بالعامية المصرية وهي كما تعلم لا تخضع لقواعد لغوية .. أما لو تقصد مدونة (الى البحر) فبالطبع اهتمامي باللغة الفصحى هناك كبير واتمنى لو حضرتك صادفت كلمات غير دقيقة لغويا تنبهني ليها

تحياتي واحترامي وتقديري

مها البنا