Saturday, November 17, 2012

يابو قلب أخضر


قوم يابني خلاص
الباص هيفوت ..
قوم إغسل وشك ..
إجري يا مسخوط
قوم ياللي تاعبني ..
آه يانا يا قلبي
****
أنا قمت خلاص ..
أنا جاهز أهو
فين بقى مصروفي؟
وكرَّاسي وبووتي؟؟
فين بقى نضارتي؟
وهاتيلي مسطرتي
أنا كده هتأخر
فين الكراسة .. أم كوفر أحمر؟
****
آدى الكتاب والمسطرة
وادي الكراسة بجلادها الأحمر
وهبخرك بالمبخرة
لجل الحُسَّاد يابو قلب أخضر
جهزت قميصك وكويته
ومسحت الجزمة السودا بنفسي
وعقدت رباطها على عوده
زي ما بتحب يا متعطر
مش بتحب البيض يا ضنايا؟
طيب جبنه جوه العيش؟
طيب كفته ؟؟ برده مفيش؟
طيب هات اللى انت تحبه ..
آدي المصروف
مش هرجع اقول لازم تاكله
ولا احس بخوف
بس انت تعالى وانا اضمك
هعملك كل اللى تعوزه
مش راح اقول لأ
بيقولوا مانتش راجع تاني
قال يا ضنايا ؟
طبعا مش صح
دول مش على حق
دول مش فاهمين
أنا شيلتك عمري جوايا
من غير ما اقول
من وانا بنوته صغيوره
وانا عارفه انك هنا جوايا
مستني الوقت اللى تجيني
يا كل سنيني
عشرين سنه وانا صابره عليَّا
مستنية اللحظة دا هيا
لما اشوفك
واسمع صوتك
وامسك كفك بين اياديني
دلوقتى بيدوني قماشة
ويقولوا ده كفنك يا عيوني
مش ممكن أصدق لو حاولوا
ازاى هتسيب ماما حبيتك
طيب لعبك؟
مش عاوز تلعب وياهم؟
انا اهوة لسه شايلاهم
بس انت تعالى وانا هلاعبك
لكن دمك لسه عليهم
دمك يا حبيبي غطى ملامحك
كان نفسي اشيل عنك جرحك
كان نفسى اسهرلك يوم فرحك
وافرح بعروستك وحبيبتك
لكن سواق اتوبيس اطرش
مع سواق قطر اعمى واغبش
حرموني منك
كل اللى سابوه منك دمك
موجود على لعبك يا ضنايا
وألمك محفور جوايا
لكن يوم ورا يوم راح ازورك
ومعايا كراسك الأحمر
يابو قلب أخضر
وهلاعبك باللعب الحلوه
وهغنيلك اجمل غنوه
لكن من غير لحن جميل
اصلك خدت اللحن معاك
وسيبت الدنيا في صمت حزين
ومفيش غير اني ادفن قلبي
واستنى الوقت اللي يجيني
فيه ملك الموت علشان اشوفك
وارجع من تاني ابقى معاك
يا حياتي وعمري وسنيني
يا أرق ملاك

8 comments:

حنين محمد said...

مساء الغاردينيا مها
يالله كم بكيت وكم وجعتني وكم شعرت بقلب كل أم فقدت أبنها وضناها تودعه الصبح عشان راجع لحضنها بس راح ومارجعش عارفه مش ممكن حاجة في الدنيا تجبر كسر قلبها أوتزرع ابتسامة من جديد على شفايفها حرام بجد الي بيحصل فين الإهتمام فين المسؤلية دا مش اول مرة يحصل في مصر العالم بتستخف بحياة الناس معقولة بقت رخيصة كدا ؟
ربنا يضمد جرح كل ام يارب "
؛؛
؛
لروحك عبق الغاردينيا
كانت هنا
Reemaas❤

الميكروباص said...

وتسير البلد من مصيبه لأخرى

ربنا يسترها علينا

هبة فاروق said...

ازيك يا مها حبيبه قلبى وحشتينى حبيبتى
كنت اتمنى ان اعلق هنا فى ظروف افضل من ذلك بس وجعتى قلبى يا مها بجد تعبت وانا بقرا الكلمات ربنا يحفظ اولادنا من كل سوء كل يوم ادعى الله ان تأتى ابنتى سالمه اصبح العالم فى الخارج بشع منتهى الاهمال
ربنا يصبر اهالى الاطفال الابرياء

مها البنا said...

ريماس

أسعد الله صباحك جميلتي الرقيقة :)

الموضوع أصبح كله ينصب في مسألة واحدة يا صديقتي ..

مسألة ( ضمير ) .. وبس

مها البنا said...

لورنس العرب

آمييييييين

ربنا يسترها

مها البنا said...

هبه فاروق

لا أسكت الله لكِ حسا ولا حرمنا طلتك الجميلة :)

الكلمات بتوجع القلب يا هبه .. أنا معاكي

بس صدقيني ..

منظر الدم بيوجعه أكتر

وبكتير :(

أحمد سعيد said...


وهغنيلك اجمل غنوه
لكن من غير لحن جميل
اصلك خدت اللحن معاك
وسيبت الدنيا في صمت حزين
الله ينور بجد تسلم ايدك وقلمك تحياتى

مها البنا said...

أحمد سعيد

سلم مروركم وتشجيعكم الطيب

تحياتي