Tuesday, December 14, 2010

أسفه ,, خلاص كتبت الواجب


طبعا وقبل أى شئ أحب أعتذر عن غيابى الفتره اللى فاتت وتأخرى عن الكتابه واللى كان غصب عنى فعلا .. قلمى معاكس بشده ومعاند معايا بشكل لم أعهده من قبل لكن بإذن الله الأمور تتظبط وأنزل قريب بوست جديد
وحقيقى سعدت جدا بكل اللى سألوا عنى سواء على المدونه او الفيس بوك او غيرهم
حسسونى ان ليا قيمه وان غيابى له معنى وبشكرهم بجد من قلبى على سؤالهم وإهتمامهم :)

المهم بقى أنا النهارده جايه ومعايا واجب مدونى من نهى صالح صاحبة مدونة كلام فاضى



وأحب أقول إن دى أول مره يجينى واجب تدوينى وفى الحقيقه برررضه فرحت بيه ومش هعتبره تدبيسه لكن هعتبره رغبه من صاحبة المدونه فى اعطاء الغير فرصه للتعرف عليا

ومن باب أنا لا أكذب ولكنى أتجمل :) فسوف أحاول الإجابه بشكل يظهر ما هو حسن بداخلى ويخفى عيوبى .. فتلك هى النفس البشريه .. وتلك هى رغبتها اللحوحه فى الظهور فى أبهى صورها.

كفايه رغى بقى ونكتب الواجب

السؤال الأول..
هل أنا فضوليه وأحب أن أتدخل فى شئون الأخرين؟

الحقيقه السؤال يتكون من شقين .. الشق الأول هو هل أنا فضوليه؟؟
والإجابه نعم .. عندى فضول رهيييييب للمعرفه .. أموت فى القراءه ولا أكدا أمسك بكتاب حتى تشتعل بداخلى نار الفضول لقراءته فلا أدعه حتى أنتهى منه.
أما بالنسبه للناس فأعتقد أنه يمكننى القول أننى لست فضوليه على الإطلاق .. بل وأستطيع أن أقول أننى كائن متوحد يعشق التواجد بمفرده أو ربما بصحبة البعض من وقت لأخر وليس طوال الوقت. 
وهذا يحملنا إلى موضوع (شئون الأخرين) والذى أصبح من الواضح أننى أهتم لشئونهم وأسعد وأحزن من أجلهم ولكن بلا تدخل يذكر إلا إذا طلب أحدهم منى ذلك ، فحينها فقط لا أتورع عن بذل عمرى عن رضاً وقناعه حتى أرفع عنه ما يعانيه.

السؤال الثانى ...
ما هى الأسئله التى تستفزنى؟

يهيألى أنه لم يعد بإمكان شئ على الإطلاق إثارة إستفزازى .. فلا أرى العالم من حولى يستحق أن أحترق كمداً حتى يرقص أحدهم فرحاً وطرباً .. م الأخر .. مفيش شئ يستاهل :)

أتمنى أكون جاوبت على الواجب صح والأستاذه تدينى نجمه عشان اروح لمامتى واخد منها ربع جنيه مكافئه زى زماااااان

سلاااام
 

16 comments:

Anonymous said...

شخصية رائعة
متابع بوستات حضرتك
وبجد كلها جميلة
ان شاء الله تحققي كل احلامك وامنياتك

Unknown said...

10/10 في الواجب أول زياره لمدونتك و يسعدني متابعتك:)

Noha Saleh said...

ياسلام ياسلام ع الاجابات الجامدة
اجابة السؤالين هايلة
بس اجابة السؤال التانى هايلة جداااااااااااااا
شاطرة عرفتى تحلى الواجب وتاخدى الدرجة النهائية:)

Tamer Moghazy said...

متهيالي لو اتسالت السؤال الاول كنت ها اجاوب نفس الاجابة.

اما بقى السؤال التاني فا انا كنت ها اقول ان اكتر سؤال بيستفزني هو : انت فين..؟
لما حد يكلمني على الموبايل..!!

Wise said...

ياااااااااااااا الحمد لله
ان الموضوع طلع اشاعه
اصلى سمعت ان المدونة ده عامله بيات شتوى
بس طلعت اشاعة
عجبنى ردك على الاسئلة
ردود فى الصميم
وبعدين انا لازم اقول لنهى المرة الجايه بما انك طالبه ملتزمة جدا وبتعملى الواجب اننا نخلى الواجب يا زجل يا قصة
فكرينى اقول لنهى بس
واكمان انا كنت متفقه انا اللى اصحح الواجب امال انا لزمتى ايه هنا فى المدونة
مش لازم امارس مهام عملى
الله
عودا حميدا لمدونتك وفى انتظار ما تخطه اناملك من كلمات رائعة

Casper said...

اجابات قوية ومنطقية

________

خالص تقديري واحترامي

هبة فاروق said...

اول زيارة لكى ومدونتك جميلة واسلوبك يدل على ثقافتك ونضوجك الفكرى
اعترفات صريحة وواقعية
وتدل على انك انسانة جميلة من الداخل
متباعكى ان شاء الله

مها البنا said...

غير معروف
أهلا بيك فى المدونه وسعيده برأى حضرتك الذى يدل على نجاحى فى توصيل صفاتى الطيبه وتغطية المساوئ
أتمنى حضرتك تكرر زياراتك

و.. مرحبا بك

مها البنا said...

شيرين سامى

أنا أيضا يسعدنى متابعة كاتبه جميله مثلك

ومتشطرين على العشره من عشره

بس فين النجمه؟؟؟

مامتى زمان كان لازم تشوف النجمه عشان تدينى الربع جنيه

كانت بتقولى 10 من 10 مش كفايه

لاااازم تميز :(

مها البنا said...

نهى صالح

كاتبتنا الهمااام

بررررضه فين النجمه يا نهى؟؟

كده تحرمينى من الربع جنيه؟

مكانش العشم :(

مها البنا said...

Timo

أحييك على إختيارك نفس إجابة اسؤال الأول

بس عاوز رأيى؟

لما حد يستفزك ويقولك إنت فين؟؟

إستفزه وقوله فى الدنيا :)

وكده تبقوا خالصين

لكن طبعا نثتثنى من هذا الرد المستفز الوالدين والزوجه

أه .. مش عاوزين مشاكل :)

مها البنا said...

Wise

الحقيقه برافو عليكى ... عرفتى ازاى انى فى بيات شتوى؟؟

حاسه ان قلمى ومشاعرى متجمدين

مبقاش فيه شئ قادر يهز قلمى عشان يكتب

يالا .. ده من رحمة ربنا بيكوا :)

مها البنا said...

Casper

كنت أحب أعرف حضرتك كنت هتجاوب بإيه

عموما نورت المدونه ومش تكون دى أخر مره :)

مها البنا said...

هبه فاروق

كل ده؟؟

الحمد لله الذى ستر عنكم عيوبى فى الدنيا .. اللهم إنى أسألك سترها فى الأخرة أيضا .. أمين

نورتى المدونه يا قمر

ويسعدنى متابعتك :)

موناليزا said...

أحييكى بجد لان ماعدتش فيه اسئلة ممكن تستفزك:)

مها البنا said...

موناليزا

تحيه مقبوله

معتقدش حد يستاهل احرق شوية الأعصاب اللى فاضلينلى :)

نورتى يا قمر