Friday, June 4, 2010

حنفى البقال


شفت الواد حنفى البقال عايش عمره وعال العال
يصحى الصبح يرش المياه ويطلب شاى من عبد العال
يدعى بصوته العالى يارب .. حلى أيامنا برزق حلال
يوم والتانى وحنفى قصادى بايع الدنيا بروقان بال
كل الناس على طول بتحبه .. ووقت الشده واقفين جنبه
واد على حق محدش غلبه .. مهما اوصف بكلامى محال
اوصف واحد كل حياته صاحب صاحبه وفى صلواته
داعى للخلق بحالوا يعيشوا عيشه هنيه بلا إشكال
دقنه جميله ريحتها الطيبه متظبته متساويه تمام
بسمه رقيقه على محياه .. تسعد فعلا لو ترآه
أمه بتدعى فى كل صلاه ربى يصونه ويرُوقله الحال
صاين امه وحافظ دمه وراعى لحق الجار والدار
نفسى فى يوم لو زوجه تصونه .. يوم ترعاه ويحفظها بدوره
والذريه الصالحه تكونلوا من ضمن الرزق المتقال
واد على حق تشوفه هتفرح .. دينه أفعال مش بس كلام
ربى يصونه يارب بكرمه ويقدره فى رعاية امه
ويديله على اد ما عمله طبق فيه دين المتعال
الاسلام ياخوانا بجد مش كلمات بالصوت تتقال
ولا صوره لقفطان متقصر ولا دقن صاحبها محتال
ولا بنقاب هظلم من لبسه .. وأقول ده راجل وهيسرقنى
أو ست وهتخطف ولدى أو هربان من حكم الأبدى
وأفضل قاعد فكرى يودى انه اكيد فى رصاصه هتضرب
وان الدنيا فى لحظه هتقلب والشرطه هتيجى وهتاخده
وهى يا عينى بنت رقيقه حبت يوم م الرب تقرب
يبقى جزاتها نظره حقيره ؟ حوش عنها يارب يا ستار
واحفظها نظر الجُهَّال
الإسلام وف اجمل صوره .. إن الواحد يحفظ نفسه
يراعى الرب طبيعى فى عمله
ويهاب من رب الأعمال
مش من صاحب الشركه بتاعه ولا بينافق لجل متاعه
يبقى كتير ومرتبه يعلى .. بالذل وسوء الأعمال

4 comments:

Noha Saleh said...

حلوة اوى يامها بجد شدتنى من اول مابدأت أقرأها

مها البنا said...

الأحلى ردك يا نهى .. الحمد لله انها عجبتك
ولو انى كنت خايفه تكون مش مظبوته قوى .. بس فكرة الملتزم الصح رغم انها واضحه لعيوننا كلنا .. الا انها أصبحت صوره للخطر حتى بينا وبين نفسنا للأسف

عموما الزجل ده كان بدفعه قويه وتشجيع من وايز عشان اكتبه .. الله يباركلها

Anonymous said...

بارك الله فيكي وربنا يرزقنا الالتزام

مها البنا said...

وفيكم .. أمين