كنت قاعده فى مكتبى بصيت لقيت اليوم ميلادى
قلت اكتب أهنى نفسى رغم إن الحدث عادى
جبت شمعه صغيره وولعتها
وقعدت شويه على الكرسى ومن بعيد بصيتلها
وقمت رحت جبت يجى عشرين شمعه جنبها
وفضلت قاعده
فات أد إيه من الزمن؟
صدقونى مانيش فاكره
وقعدت أعد السنين
أيام كتير مليانه فرح وبالأمل متلونين
وأيام تانيه ملونه بلون واحد بس إسود حزين
قمت تانى من مكانى ورحت جبت شمعتين
وقعدت أعد
لسه كتير على ما يكمل العدد
وقعدت أراقب ألوان الشموع من غير سبب
كان كل شمعه من شموع الفرحه لونها مزهره
وكل شمعه من شموع الحزن لونها إسود
لون الرماد فى المبخره
والنسبه بين اللونين
كانت لصالح الألم وأيام العذاب ولحظات الأنين
ولقتنى قاعده بيقتلنى الحنين
لزمان زمااان لما كنت صغيره
بضفيره واحده مجدوله على ضهرى
كنت بفرح يوم ميلادى من جهلى
مكنتش أعرف إن بكره هتمر السنين
وهشوف حاجات لو كنت أعرفها من صغرى
ما كانت البسمه فى يوم اترسمت على ثغرى
ولا كنت هفرح كل ما تمر السنين
ورفعت عينى للشموع من جديد
لقيت نصها ساح على التارت اللذيذ
وإمتزجت الألوان بمزيج عجيب
لوحه متحدده بالإسود
وعلى الجوانب كان متنطور الزبيب
وفى قلبها كانت الألوان جميله
راسمه بنت صغيره واحده بضفيره
فى إيديها ثمرة من ثمر الكريز
وايديها راكنه على الكتب
مش عارفه ليه لما رأيتها إفتكرت أمنحتب
كان برضه غاوى العلم والدراسات
لكنه كان فرعون والأن من الأموات
مات وساب بصماته يرووها فى الحكايات
بصيت للتورته تانى .. والصوره كات عاجبانى
ولقيت البنت بتضحك وجمالها كان ربانى
مش عارفه ليه إبتسمت
وبطرف صباعى على التورته رسمت نخلتين
ونفخت نفخه كبيره طفيت بيها الشموع
وفتحت مذكراتى
وكتبت بخط إيدى
اليوم كان يوم ميلادى
هقلب هنا الصفحه
وهبدأ تانى حياتى
اللى فات من قبل مات
واليوم خلاص مفيش رجوع
هتولد تانى من جديد
والعام اللى جاى أتمنى إنه يكون سعيد
عشان أحط شمعه واحده مزهره
وأكسر بإيدى المبخره
وأفرح أكيد
ويبقى فعلا يوم ميلادى
أحلى عيد
33 comments:
ربنا يسعدك دايما يارب يا مها
و يرزقك العمر الطويييييييييل وا لعمل الصالح المفيد اللى بيه تسيبى بصمتك و الكل يفتكرك بيه
مش عارفة بقى هى الخاطرة خاطرة و بس و لا هو فعلا عيد ميلادك بس عموما
كل سنة و انتى طيبة ياقمر
ربنا يكرمك يا شموخ على الدعوات اللى اجمل من بعضها دى .. بس ربنا يباركلنا فى عمرنا .. مش مهم يطول ولا يقصر .. المهم ينفعنا فى اخرتنا ويكون فى ميزان حسناتنا
هو انا فعلا يوم ميلادى كان امبارح
عشان كده هقولك وانتى طيبه يا قمر والى الله اقرب واتقى
بجد فرحت بردك ودعواتك .. ربنا يباركلك
أولا:كل سنه وحضرتك طيبه واسعد الله ايامك دائما
_____________
نسأل الله أن لا نكون من الذين تلهيهم الدنيا ثم
يكتشفوا فجأة بأن رحلتهم فيها علي وشك الأنتهاء
عيد ميلادك احلى عيد و دائما سيكون سعيد فلولا الحزن ما عرف الناس الفرح و لولا الليل ما ادركوا النهار تامر البنا
السلام عليكم ورحمة الله وبركاااته
مهااا
أولا : كل سنة وانتى طيبه يا حبيبتى وعقبال 100 سنه تقضيهم في طاعة الله يارب
اما بقي الخاطره الجامده دى فبقالى زمن مفتقده قلمك بس عذرك انك رجعتى بقوة
ربنا يجعل كل شموعك وايامك فرحه وسعاده وما يمتب عليكي الحزن ابدا
طبعا طبعا .. عرفتيني
do3aa El-Shoprawy
كل سنة وانتي طيبة
ومن عام إلي عام احلي وإلي الله اقرب
بجد جميلة وبتتكلمي عن كل اللي بيدور في اذهنا علي ما اظن حاليا
في كل عيد ميلاد
كل سنة وانتي طيبة مرة تانية وبجد بوست جميل ويعبر عن اكثرنا
دومتي بخير
كل سنة وانتى طيبة يا مها
وكل سنواتك باذن الله تكون شموع مزهرة
ربنا يسعدك ويوفقك
كل سنة و انتى طيبة
و يارب تكونى سعيدة دايماً
قصيدة جميلة جداً
تسلم ايدك حبيبتى
تحياتى لك
مها يا متميزة جداً
كل سنة و انتي بكل خير..
الحزن مش دايم و لا حتى الفرح دايم ..
:)
كلنا كان نفسنا نكبر و آدينا كبرنا .. المسؤولية كبرت و الألم كبر و زاد
كل ما بنكبر .. كل ما بنتعب أكتر لما نبتدي نفهم طبيعة الدنيا أكتر
ربنا يحميكي يا مها
و يقوي قلبك ..
و يكرمك و يحفظك يا رب
كل سنة وانتى طيبة وبألف خير
ربنا يسعد اوقاتك دايما
جميل اوى البوست ده يامها
ايام طفولتنا كانت اجمل ايام
ياريت نقدر ننبسط زى ماكنا مبسوطين زمان
كل سنة و إنتي طيبة
rack-yourminds
جميعنا هذا الرجل
شكرا على تهنئتك
تامر البنا
أنت محق تماماً أخى الأكبر العاقل .. فلولا الأسود ما استطعنا الحكم على أبيض اللون .. ولولا مرار العلقم لما استشعرنا جمال قطعة السكر
فرحت بمرورك على المدونه بجد
اتمنى تكررها كتير : )
دعااااء
أختى الشقيه جداً
الحمد لله انك سامحتينى
يارب اعرف اسامحك لما اقرالك حلقه جديده
غايبه علينا بقلمك فى الشعر والقصه
منتظرااااكى بجد
وكل سنه وانتى طيبه
أستاذ مجدى حاتم
وحضرتك طيب وبخير
سعيده ان البوست عجبك وكان فيه شئ من أغلب الناس
دمت على خير
Anonymous
شكرا على الامنيه
سلسبيل
وانتى طيبه يا قمر
بقالى مده مش بشوفك ولا بنقرالك جديد
يا ترى خير؟
قهوة بالفانيليا - شيماء علي
متميزه مره واحده؟؟
الله يعزك
تعرفى ان عندك حق؟
كل ما افتكر وجهة نظرى فى الدنيا زمان والناس
كل ما اعرف اد ايه كنت ساذجه
وكل ما اشوف تصرفاتهم وافعالهم ومبادئهم الملتويه دوقتى
كل ما اعرف اد ايه الزمن ده هو فعلا .. عصر الماده وليس عصر السرعه
نسأل الله العفو والعافيه
بجد اسعدنى ردك وإطرائك .. على الرغم من يقينى بأنى لا استحقه : )
نهى
زمان أبدا لا يعود
للأسف
كل سنه وانتى طيبه
ويارب متغيبيش تانى كتير .. عشان بنفتقد نقدك اللاذع فى صوره اللطيفه
يوميات شحات
وحضرتك طيب وبخير
السلام عليكم
ما أجمل أن نبدأ عامنا الجديد كل مرة وكأننا نبدأ حياتنا
فنتذكر الماضي بفرحه وحزنه
ونحاول أن نجدد الأفراح ونبدد الأحزان
وأن نجعل ماهو آت أفضل مما فات
كل عام وانتي بكل خير
:)
السلام عليكم ورحمة الله وبركاته
ااولا كل عام وانتى الى الله اقرب واتقى
ثانيا عقبال 100 سنة كلها طاعه ان شاء الله
ثالثا وحشتنى جدا بوستاتك المتميزة
رابعا وخامسا وسادسا
كلامك اروع من تقييمه
ممتاز كالعادة وفكرته متضمنه احساس عالى جدا
بارك الله فيك وجزيت كل خير
أستاذ علاء سالم
من لم يستفد من ماضيه .. حق له السقوط فى نفس بئر الأخطاء مرة أخرى
وحينها لا يلومن إلا نفسه
أسعدنى مرورك وتعليقك
دمت بخير
Wise
أولا وثانيا وثالثا ورابعا وعاشرا..
لا تحضرنى البلاغه الكافيه للرد على جميل كلماتك
ولكنها أسعدتنى ولا شك حتى وإن كنت أعلم أن محبتك لى تجعلك ترين الأشياء أجمل مما هى عليه فى الواقع
دمتى لى خير أخت فى الله :)
كل سنه وانتى طيبه بمناسبه عيد ميلادك
معلش جايه متاخره
لكن سماح بقى
وكل عيد اضحى وانتى بخير
ربنا يسعد قلبك
وبفرحك ديما
mrmr
كل سنه وانتى طيبه يا جميل
وعيد سعيد على الجميع بإذن الله :)
انتى فين ياقمر
غايبة كتير ليه
وفين الجديد
نهى
سامحينى والله غصب عنى
حالة ركود أسأل الله انها تنتهى قريبا وعلى خير
أنا مكتفيه بالمتابعه فى الوقت الحالى ولو كتبت جديد أكيد هنزله
حقيقى سعيده جدا بسؤالك
القادم اكيد أجمل
عام جديد وعليكى سعيد
مها كلامك رااائع بمعنى الكلمة والله كلنا نتسال عن حياتنا قضيناها خير و لا شر و لا حنتعدل بقا و لا لسة يارب استرها معانا دنيا و اخرة
حببتي انت من من اتمنى زيارتهم مدونتي لرقي كلماتك و عبق حرفك و ثقل المعاني في شرحك
جزاك الله خيرا
موناليزا
أكيد الجاى أحلى بإذن الله
نورتى المدونه : )
مخبوطازاد
كلامك كتير قوى عليا
يارب أكون على قدر ولو ضئيل منه
أكيد همر بمدونتك ان شاء الله ورأيى هبقى أقوله هناك
إبقى تعالى كتير : )
اولا السلام عليكم ورحمة الله وبركاته
أحب أن أحييكِ على الخاطرة كفكرة وكصياغة وكأسلوب وكتعبيرات
________
كثيرا ما يصاحب هذا اليوم - عيد الميلاد - توارد العديد من الذكريات كفيلم سريع يمر أمام أعيننا
نرى ذكرى جميلة فنبتسم ونرى أخرى حزينة فنبكي
لكن نعود ثانية لنُعلم أنفسنا أنها ذكريات رحلت بالتأكيد لن ترحل عن بالنا لكن ثَم نعمة النسيان والتى تخفف عنا آلاما كثيرة ماضية
لكن مع ميلاد يوم جديد وعام جديد فستشرق شمس جديدة وإشراقة أمل ونظرة تفاؤل وابتسامة من أجل الحياة
__________
سرحت كثيرا مع جو الخاطرة
بالتأكيد هي خاطرة رائعة وأسلوب بسيط سلس لكنه قوي
وجدت تناغم غير عادي بين الكلمات
وتسلسل فكري في الخاطرة لم أعهد رؤيته كثيرا في عالم المدونات
__________
بالتوفيق دائما
وفي انتظار ابداعات جديدة
خالص تقديري واحترامي
ويارب يجعل كل أيام حضرتك سعادة وفرح
________
تقبلي مروري
Casper
Post a Comment