في عز العتمة

في عز البرد والعتمه
لسه القلب بيعافر
وبيخاف من زمان عدى
ومن بكرة
وبيخاف من كلام اتقال
وبينزف من الشدة
ولسه كتير جوه القلب من كلمة
ومن همسة
ومن صرخة
ومن لمسة
ولسه حاجات كتير لسه
لكنه في صمته متلحف
ومتكتف
وطعم الصرخه جوه ضلوعه طعم الدم
وبينزف
لكن عندي ليكم بشرى
أنا لسه
اكيد لسه بقلب جرئ
ولسه القلب نبضه برئ
ولسه في روحه كل الخير
ولسه صديق
ولسه الحب في عيونه
ولسه الخير زارع ورد
وسط الضيق
وفي الضلمة
هغسل قلبي واتوضا
واصلي الفجر في المحراب
وبعد الفجر هستنى
مهو لازم أشوف الصبح
بعد العيشة في العتمة