Friday, January 10, 2014

وجهة نظر


بحب كتير لكن خايف
يكون القلب مش ملكي
وأشوف نفسي ومش شايف
سِوا علامات على قلبي
وأشوف أحلام بتتكسر
وأبص لبكرة وأفكر
ومين ممكن يشوف وجعي
ولو مرة يعيش حلمي
وأشوف الناس بعين تانية
وأشوف جوا قلوب فيهم
مآسي كتير من الدنيا
وناس ياما قلوبهم خير
ومليانة بحاجات للغير
وأشوف برضه قلوب فاضية
قلوب مقفولة جواها
وناس تانية قلوبها كتير
مفتوحة بإيجار للغير
وناس فاتحاها للتدريس
وناس قافلاها على مفيش
وناس رابعة وناس خامسة
وياما كتير
وأشوف قلبي ..
ألاقي جوه منه كتير
لكن خايف ..
لا يفتح سكة يوم للغير
يكون أعمى البعيد عني
ولا شايف ..
يقوم يمشي عليه سكة
لا يوصل يوم مع غيري
ومن طيبتي ..
أخاف أدعي يموت قلبي ..
ويبقى حديد
أعيش تعبانة من غير قلب
وأخاف أكتر .. 
وأموت م الخوف لو أتصور
حياتي خالية من غير حب ،،،