Friday, August 10, 2012

أيوه عادى


أيوه عادى على فكرة
وطبيعى جدا كمان
أسرح أو أفكر فى بكره
أو أخاف وأدور ع الأمان
أيوه عادى أعيش حياتى
أو أقفًّل كل البيبان
وبرده عادى تكون حياتى
بين الفرح والأحزان
أبيض .. عادى
أسود .. عادى
حتى كمان لو لونها رمادى
هى الدنيا .. وأنا الإنسان
ليه بتقولى مش عارفانى؟
ليه بتخافى ومش حسانى؟
أنا بتغير؟
برضك عادى
طيب بصى !!
عيشى حياتى
غنى يوماتى
وإملى عيونك لمعة فرح
وسيبى الجرح
أبقى عيشيه فى الضلمه لوحدك
وليلة سعدك ..
يوم ما جفونك تبقى تنام
ومع الأيام ..
راح تنسينى
وهتنسحبى من شرايينى
ويومها هعاتبك أنا وهقولك ..
إتغيرتى 
ياااه .. وكبرتى
يجى ٣٠ سنه كده فوق عمرك
ليه يا حبيبتى؟
علشان عيشتى بدالى يومين؟
طيب عادى ..
إرجعى زمنك تانى يا شابه
وبطلى لومى مع اللايمين
أصل الناس يا حرام مش فاهمه
ومش عارفين
إن أفراح الدنيا قليله
وإن الحزن في منه كتير
بس الناس مش عاوزه تصدق
عاوزه الواحد منا يا ستى
يرسم ضحكه جميله على فمه
وهو بيغرق
يبقى أنا ليه أشغل بالى بيهم؟
أيوه سيبيهم
أصل حياتى مش واقفه عليهم
ولما تعوزى فى يوم لمساعده
عندك ربك
أوعى تروحى لواحد خلقه
وإفتكرينى
بس إياكى تعيشى سنينى
عيشى حياتك عادى وطبيعى
إفرحى .. عادى
وإزعلى .. عادى
بس إيااكى
أيوه إيااكى فى عز حماسك
تمشى ورايا وتعيشى حياتى ،،،