Wednesday, February 9, 2011

سؤال

سألتنى ليه ما بتبكى؟
صعبان عليا حالك
إحكى اللى عندك وإشكى
أنا عاوزه أعرف مالك
ليه العينين حزينه؟
إحكى وريحى بالك
أنا قلت هبكى ليه؟
ومين اللى يستاهل؟
أنا دمعى غالى عليا
ونزوله مش ساهل
والقلب مهما شرب
من غدر أو غربه
ومهما جسمى أتوجع
من شدة الضربه
عمرى ما هبكى فى يوم
ولا حتى دمعى يحن
ده انا قلبى غالى عليا
وعمرى ما برضى بظلم
أبكى على اللى خان؟
ولا اللى كتم الحق؟
ولا اللى ماشى يدوس
بجزمته ع الخلق؟
أبكى على الجبان؟
ولا اللى مش قال لأ؟
وشهد بالزور عليا
وحلف يقول الصدق؟
أبكى على مين قوليلى؟
مين فيهم يستحق؟
أنا دمعى عندى غالى
مش حبر على الورق
لو يوم تنزل دموعى
على غدرهم ليا
سيبت إيه لحبايبى؟
وإخواتى ونور عنيا؟
سامحينى مقدرش أبكى
ع العينه ديا
أنا دمعى كيف الدم
يجرى فى شرايينى
ومهما كوانى الهم
هفضل فى عشرينى
عرفتى ليه ما بابكيش؟
ولا أحكى من تانى؟