Saturday, July 31, 2010

مصر


تحديث 

بما إن مصر وحشتنى قوى

وبما إن مصر محيرااانى قوى

وبما إنى قريت بوست  يعنى إيه كلمة وطن

فى مدونة كلام فاضى

وفكرنى بحاجات كتيييييير قوى

فقلت أحدث البوست ده ونقراه كلنا سوا

يارب يعجبكم وتوصلكم رسالتى

دمتم فى خير


سألونى يوم عن الحياه وعن القدر
وقالولى ممكن بالدعاء نمحى الخطر؟
سألونى برده عن الألام وعن الوجع
وعن المفاصل والمقاصل والسلع
سألوا كمان عن شمسنا وقت الرحيل
وعن مصر الحبيبه
ولو فعلا المصرى أصيل؟
وقالولى أنتم فراعنه ولا أبناء نيل؟
ولا أنتم ملكوش جنس ومن كل حدب نُسِّيل؟
**********
أنا قلت فرعون كان ملك حكم البلاد بالنار
بنى الهرم والمعبد وساب حضاره غايه فى الإبهار
وكان برضوا يوسف وموسى فى مصر ويا هارون
وكمان فى مصر زمان كان النبى إبراهيم
أقول أبوهم كلهم .. أبو العرب إسماعيل
كانت أمه مصريه .. هاجر زوجة الخليل
لو كل دول من مصر .. ومصر فيها النيل
وكلنا من نسل هاجر وإبراهيم
تفتكروا بالفطنه ياهل الأدب والقول
المصرى من كل ده ممكن يبقى إبن مين؟
**********
سألونى قالوا طيب لو كنت إبن النيل
والمصرى أصله الطيب خلاه إبن الخليل
فينكم من العروبه ومن النشيد الطويل؟
فينكم من القوميه؟
فينكم من الحريه ومن الديمقراطيه
والعلم والترتيل؟
لو كنت مصرى أصيل
فينك يابن النيل من ثورة التصحيح؟
والأرض والمماليك
وعبيد فى صحن البيت تاكل ثمار التوت
والقمح والفتافيت؟
وفين الأزهر المزهر وفين القاهره؟
فين المعز لدينه؟
وفين المبخره؟
فين مصر يابن النيل؟
واقفه هنا جنبك ولا ضاعت ورا؟
**********
أنا خدنى صمت طويل وسكت المره دى
ووقفت أسأل معاهم هى فين بلدى؟
أنا بلدى كانت هنا شاهده على الزمن
بالأزهر المحترم والهرم والجمل
والنيل والمشربيه
وصبيه صغيره بضفيره
بتلعب ويا أخوها ساعة مغربيه
وأذان فى جامع قريب معاه جرس الكنيسه
كان واقف الشيخ عُبَّيِّد مع المقدس عيسى
دورت بعنيا يمكن ألاقيهم
لقيت زمانى واقف بيبصلى فيهم
قلت إلحقنى يا زمن .. مصرى مانيش لاقيها
ولابقيت شايف نيلها ولياليها
بص الزمن نظره ساب حكمته فيها
وقال إسمع جملتى وفكر فى معانيها
مصر كانت هنا .. لما كانت مصر لولادها
هما اللى بنوها .. وهما اللى يحموها
لو عاوز مصر يابنى .. ممكن تلاقيها
لو يوم رجع نيلها يصب لولادها
ويوم رجعت ولادها من تانى تبنيها
**********

Saturday, July 24, 2010

إمشى ودوس


إمشى ودوس
على أيام الدنيا الصعبه
على أوهام أشواق ومحبه
على أحزان وبعاد أو غربه
إوعى تفكر ولا تحوس
إبعد عنها وإمشى ودوس
لو يوم جالك صاحب تانى
لازم تبقى عنيد وأنانى
فكر يوم ما يبيعك هو
يلقى هواك كرابيج وتروس
وإوعى تفكر
إمشى ودوس
لو يوم صاحب الشركه بتاعك
جه وإتسبب كده فى صداعك
فكر إن فى واحد باعك
وإن بفعله عليك مدسوس
يبقى ساعتها تبص عليه
حُط صوابعك جُوه عنيه
وإفضل قاعد على رِجلِيه لما يلوص
وإمشى ودوس
يابنى الدنيا دى مهما تحاول
أكتر م المكتوب مش طايل
ليه تقضيها صراع ومشاكل
وتحسسنى إنك منحوس
وقالب عمرى معاك لكابوس !
يابنى بقولك واسمع منى
سيب الدنيا وإمشى وغنى
واللى يبيعك يوم فى حياتك
إسبق بيعه وشيله من بالك إنت كمان
وإكتب لافته كبيره على ضهره
بالمجان
من غير فلوس
وابعد عنه
وامشى ودووووس

Wednesday, July 7, 2010

ألف وش


ألف وش وألف لون وألف كلمه مزوقين
مره ترفعنى النجوم ومره أسفل سافلين
مره تدمع بالعيون ومره كالشيطان رجيم
بره البيت عايش حياتك ع الصراط المستقيم
جوه تعمل ألف مشكل ويختفى الوش الرحيم
تتقلب كائن خرافى ليه فصيلة دم جيم
يتقلب حالك وحالى ويصبح البيت كالجحيم
يالا مش فارقه الحكايه ولا يوم هندم ع السنين
همشى وأبعد عن حياتك ولا هيرجعنى الحنين
هبتدى تانى حياتى وأكسب الباقى من سنينى
وأعتبر عمرى اللى عدى ...
.
 .
.
صفحه من كراس قديم

Friday, July 2, 2010

همسات 3

 
أنا عمرى فوق قرن الزمان بقرون كتير

حبيت أعيش دنيا الحياه حر وأمير

طاف الزمان بيا القرون لكن أنا

غير بس مأسور بالجروح ما قدرت أصير

عجبى

صاحبت صاحبى وفى الطريق سابنى وغدر

العيب في صاحبى ولا ده حكم القدر؟

العيب فيا أنا .. لأنى من البدايه

معرفتش أختارلى .. صاحب صح فى السفر



يا قلبى يا مزروع وجع السنين جواك

إجمد يا قلبى كده وأصبر على اللى بلاك

بكره الحياه تحلى وجرحك يكون ذكراك

وإياك تسيب حبل الأمل طول ما الخالق معاك

ياااارب


عمر الهموم أكبر كتير من الفرح

والقلب قاسى من العذاب ياما إنجرح

يفضل هناك رب العباد خالق السما

يكرمنى يوم واحس قلبى بينشرح


يا موت يا قاتل كل شئ فينا

طايح وشايل راسنا عن رقابينا

لا هنبكى منك ولا هنخاف خلاص

العمر لحظه وخوفى لاتضيع بأيادينا